Edhe 8 raste të reja me koronavirus në Kosovë — 71 të prekur gjithsej - Gazeta Express

Edhe 8 raste të reja me koronavirus në Kosovë — 71 të prekur gjithsej

Lajme

Gazeta Express

25/03/2020 18:16

Instituti Kombëtar i Shëndetësisë Publike të Kosovës ka njoftuar se edhe tetë persona kanë dalur si pozitivë me virusin korona pas analizave të kryera, raporton Gazeta Express.

Kjo u bë e ditur përmes një komunikate të nisur për media.

“Sot me 25.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar tridhjetë e katër (34) mostra të marra të rasteve të hospitalizuara në Klinikën Infektive dhe nga terreni. Nga këto mostra të marra për testim në virusin SARS-CoV, tetë (8) prej prej tyre kanë rezultuar pozitive”, shkruhet në njoftim.

Sipas institutit, rastet e konfirmuara pozitive janë raste kontakti prej të cilëve 4 raste janë me vendbanim në fshatin Domanek- Malishevë, 3 raste me vendbanim në Prishtinë dhe 1 rast me vendbanim në fshatin Studime e ulët-Vushtrri.

Nga data 08.02.2020 deri me 25.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 766 mostra të dyshimta në virusin SARS-CoV-2 dhe prej tyre, gjithsej shtatëdhjetë e një (71) raste kanë rezultuar pozitive, me një (1) rast të vdekjes i një të moshuari 82 vjeç./GazetaExpress/