Do të duheshin pantallona shumë të mëdha: Ylli i detit shkakton të qeshura në rrjet – ngjan me Patrickun nga SpongeBob

Fun

Gazeta Express

05/08/2025 21:59

Dyshemeja e detit është shtëpia e krijesave nga më të çuditshmet dhe më të mrekullueshmet.

Por një në veçanti është kthyer në sensacion në internet, falë “të pasmeve” të tij mbresëlënëse.

Një yll deti me të pasme të mëdha është vërejtur në thellësi më shumë se 1.000 metra nën sipërfaqen e detit (3.280 këmbë), dhe duket se ka një pjesë të pasme që do t’ia kishte lakmi edhe ndonjë që s’del kurrë nga palestra.

Kjo ka bërë që shumë shikues të hutuar ta krahasojnë krijesën me Patrick-un nga seriali i animuar SpongeBob SquarePants.

Duke komentuar në një transmetim live në YouTube, një përdorues shkroi: “Patricku i ka humbur pantallonat!”, ndërsa një tjetër kërkonte: “Duam Patrick-un me të pasme të mëdha!”

Komentet qesharake vazhdonin: “Ka palestër në fund të detit”, “Bebushi i ka pasmet”, “Këto të pasme duken më mirë se shumica” dhe “Ai emoji pjeshke duhet të studiohet”.

Krijesa portokalli u kap në kamera si pjesë e një misioni shkencor argjentinaso-amerikan për të eksploruar kanionin Mar del Plata – një nga kanionet nënujore më të mëdha dhe më të thella të Argjentinës që arrin deri në 3.500 metra (11.482 këmbë) thellësi.

Studiuesit po përdorin një mjet nënujor të telekomanduar (ROV) për të eksploruar thellësitë, ndërsa transmetojnë në kohë reale gjithçka që shohin.

Deri tani kanë transmetuar një gamë të gjerë krijesash të mrekullueshme si një kastravec deti ngjyrë të kuqe të ndezur, oktapodë, gaforre mbretërore dhe korale të pabesueshme – por asnjë nuk ka gjeneruar aq shumë interes sa ylli i detit me të pasmet.

Krijesa ka dy fryrje simetrike në shpinë, që ngjajnë çuditërisht me të pasme njerëzore.

Ngjyra e ndezur portokalli gjithashtu e bën të duket si Patrick – një yll deti naiv dhe më mbipeshë që është shoku më i mirë i sfungjerit të verdhë në serialin e famshëm të Nickelodeon, që u transmetua për herë të parë në vitin 1999.

Tani ylli i detit ka edhe një llogari të vetën në X, me emrin ‘Starbutt’, ku përdoruesit kanë ndarë meme për krijesën.

Dikush madje ka qepur me grep një version të kësaj krijese detare me të pasme të mëdha.

Kjo është hera e parë që njerëzit kanë mundësinë të shikojnë këtë oazë nënujor në kohë reale. Ai është i mbushur me jetë për shkak të përplasjes së një rryme të ftohtë, të pasur me lëndë ushqyese, me një rrymë të ngrohtë e të kripur.

Së bashku, ato formojnë “një nga rajonet më energjike të oqeanit global”, sipas Institutit Oqeanik Schmidt.

Ekspedita 20-ditore, e cila përfundon më 10 gusht, përfshin 25 shkencëtarë.

Udhëheqësi i ekspeditës, Daniel Lauretta, tha: “Fakti që çdokush mund të lidhet nga shtëpia dhe të shohë atë që po shohim ne në kohë reale është një mundësi unike. Shkenca nuk është më diçka e largët apo e paarritshme, por bëhet pjesë e jetës së përditshme.”

Përveç imazheve dhe transmetimit live, ROV-i, i quajtur SuBastian, ka mbledhur mostra biologjike me krahët e tij robotikë.

Kjo nuk është hera e parë që shkencëtarët zbulojnë një krijesë detare që i ngjan diçkaje nga seriali SpongeBob.

Në vitin 2021, shkencëtarët detarë vunë re një sfungjer të verdhë deti dhe një yll deti rozë duke “qëndruar bashkë” në jetën reale.

Dyshja e adhurueshme u pikas në anën e një mali nënujor të quajtur Retriever Seamount, rreth 200 milje larg nga Nju Jorku.

Shkencëtari Christopher Mah, nga Administrata Kombëtare Oqeanike dhe Atmosferike (NOAA), ndau zbulimin në X, duke shkruar me humor: “Normalisht i shmang këto referenca… por UAU. SpongeBob dhe Patrick në jetën reale!”

Ekspertët kanë shpjeguar më parë pse yjet e detit ndonjëherë duken sikur kanë të pasme njerëzore.

“Ndonjëherë yjet e detit i relaksojnë krahët, për shembull kur ushqehen,” tha Nate Jaros, kurator i peshqve dhe jovertebrorëve në Akuariumin e Paqësorit.

Ai shpjegoi se ndonjëherë graviteti mund të shkaktojë “rrëshqitjen e komponentëve të brendshëm”. /GazetaExpress/