Distria Krasniqit nuk i ndahen sukseset, e nis vitin mbarë me medalje të artë

Sporte tjera

Gazeta Express

28/01/2022 19:28

Distria Krasniqi e ka vazhduar rrugën e suksesit.

Xhudistja pejane ka shkëlqyer sot në “Grand Prix Almada 2022”.

Kampionia olimpike ia doli ta fitojë medaljen e artë në garën që po mbahet në Portugali, shkruan “Gazeta Express”.

Krasniqi i deklasoi një nga një kundërshtaret në kategorinë deri në 52 kilogramë, ku u rikthye pas pensionimit të Majlinda Kelmendit.

Krasniqi në finale e mposhti me Ippon garuesen kroate, Ana Viktorija Puljiz.

Paraprakisht, Disi e kaloi rrethin e parë pa luftë.

E në atë të dytë e mundi me Wazaari dhe me tri dënime për Ippon francezen Leonie Gonzalez.

Në rrethin e tretë, xhudistja pejane ishte më e mirë se spanjollja Ariane Tori Soler, të cilën e mposhti me tri dënime për Ippon.

Me këtë rast, ajo u kualifikua në gjysmëfinale.

Aty ia doli ta mposht me Ippon, Joana Diogon, shkruan “Gazeta Express”.

Në këtë rast, Krasniqi iu hakmor portugezes vendëse, e cila në rrethin e parë e kishte eliminuar shoqen e saj, Erza Muminoviq.

Edhe garuesja tjetër kosovare, Flaka Loxha u eliminua në rrethin e parë nga italiania Miriam Boi. /Gazeta Express/