Dhunoi një vajzë e mbajti armë kundërligjshëm, paraburgim për ferizajasin

Lajme

Gazeta Express

28/11/2020 17:35

Një vajzë nga Ferizaj ka raportuar të enjten në Policinë e Kosovës se është dhunuar nga një burrë. Së fundmi Prokuroria ka vendosur masën e paraburgimit ndaj të dyshuarit, i cili po akuzohet edhe për lëndim trupor dhe mbajtje të paautorizuar të armëve.

Gazeta Express

Ferizajasit S.V i është caktuar masa e paraburgimit nga Gjykata Themelore në Ferizaj, për dhunimin e një vajze ditën e enjte. Mirëpo i njëjti nga Prokuroria po akuzohet edhe për vepra të tjera penale.

Ai po dyshohet edhe për lëndim të lehtë trupor dhe për veprën penale mbajtja në pronësi, kontroll ose posedim të paautorizuar të armëve, shkruan Gazeta Express.

“Gjykata Themelore në Ferizaj, Departamenti për Krime të Rënda, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurit S.V. shtetas i Republikës së Kosovës, për shkak të dyshimit të bazuar se ka kryer veprën penale dhunimi nga neni 227 të Kodit Penal të Republikës së Kosovës (KPRK), veprën penale lëndim i lehtë trupor nga neni 185 dhe veprën penale mbajtja në pronësi, kontroll ose posedim të paautorizuar të armëve nga neni 366 të KPRK-së”, ka njoftuar Prokuroria.

I njëjti sipas vendimit të prokurorit pritet që në paraburgim të qëndrojë një muaj.

“Gjyqtari i procedurës paraprake të Departamentit për Krime të Rënda – Sahit Krasniqi, kërkesën e prokurorit të shtetit për caktimin e masës së paraburgimit kundër të pandehurit, e ka aprovuar si të bazuar konform dispozitave të KPPRK-së dhe të njëjtit i është caktuar masa e paraburgimit në kohëzgjatje prej një (1) muaj. Gjyqtari i procedurës paraprake pas mbajtjes së seancës dëgjimore dhe pas analizimit të shkresave të lëndës, ka vërtetuar se ekziston dyshimi i bazuar mirë, se i pandehuri ka kryer veprën penale për të cilën dyshohet nga ana e prokurorisë së shtetit, po ashtu janë përmbushur kushtet  për caktimin e paraburgimit të përcaktuara me dispozitat e KPPRK-së, duke marrë parasysh peshën e veprës penale, mënyrën dhe rrethanat e kryerjes së saj, duke vlerësuar se po të gjendej në liri i pandehuri mund të asgjësoj, fsheh, ndryshoj ose falsifikoj provat e veprave penale apo të ndikojë në dëshmitë e të dëmtuarës dhe të dëshmitarëve tjerë, të cilët ende nuk janë dëgjuar nga prokuroria e as nga policia, dhe në këtë mënyrë do të pamundësohej rrjedha normale e procedurës penale”, thuhet në njoftim.

Në ndërkohë policia sot ka njoftuar se ka bastisur shtëpia e të dyshuarit, ku janë gjetur dhe konfiskuar 39 fishekë të revoles dhe një elektroshok.

 “Ferizaj 26.11.2020 – 21:30.Viktima femër kosovare ka njoftuar  se është dhunuar nga i dyshuari mashkull kosovar. Viktima ka pranuar tretman mjekësor. Me vendim të prokurorit  është bastisur shtëpia e  të dyshuarit  ku janë gjetur dhe konfiskuar 39 fishekë të revoles dhe një elektroshok. I dyshuari është arrestuar dhe me vendim të prokurorit dërgohet në mbajtje”, thuhet në raport./Express