Çfarë ndodhi brenda automjetit që i transportoi dy të burgosur të rrezikshëm nga Dyzi në Gjykatë


Morena Kokollari
19 Prill 2019 16:42

Ballafaqimi kokë me kokë i dy vrasësve që vuajnë dënimet në Burgun e Sigurisë së Lartë në Dyz, ka shtyrë që të nisin hetimet dhe të suspendohet zyrtari që ishte përgjegjës që i futi të dy në një automjet transporti. Nga SHKK thanë se të burgosurit as që u takuan brenda automjetit pasi ishte i ndarë në dy pjesë, mirëpo Shkumbin Mehmeti thotë se u kërcënua nga Bedri Krasniqi. E burimet thonë se ata bën zhurmë që nuk u lejuan të marrin me vete edhe sexhadet për t’u falur

Shkumbin Mehmeti dhe Bedri Krasniqi janë të dënuar për vrasje. Njëri ishte dëshmitar i mbrojtur e tash bashkëpunëtor i drejtësisë, ndërsa tjetri kriminel i dënuar për vrasje e kidnapime. Ata pas luftës ishin pjesë e një grupi kriminal.

E që të dy dje u ballafaquan në një veturë transporti për t’u sjellë nga burgu deri në Gjykatë, në kundërshtim me rregullat.

Për shkak të këtij veprimi skandaloz, Shërbimi Korrektues i Kosovës ka suspenduar një zyrtar, por dëmi veç është bërë. Shkumbin Mehmeti u kërcënua keq gjatë këtij rrugëtimi për në Gjykatë nga Bedri Krasniqi. Kështu të paktën ka çu fjalë Mehmeti nëpërmjet avokatit të tij.

Shkumbin Mehmeti pretendoi se u kërcënua nga Bedri Krasniqi, gjatë transportimit nga Dyzi në Gjykatën Themelore të Prishtinës, ku të dy ishin nisur për seancën e njëjtë gjyqësore.

SHKK njoftoi se transporti i tyre u bë nëpërmjet automjetit i cili brenda ishte i ndarë në dy pjesë dhe se të burgosurit nuk kanë pasur mundësi të shihen e as të preken mes vete.

Burime të Gazetës Express thonë se të burgosurit e kanë bërë këtë zhurmë qëllimshëm për shkak se zyrtarët nuk i kishin lejuar që ta merrnin sexhaden me vete në Gjykatë që ta falnin drekën.

Shkumbin Mehmeti, i dënuar me 30 vjet për vrasjen e policëve në vitit 2004, ishte delja e zezë e grupit që dëshmoi për të gjitha vrasjet që i kanë kryer, përfshirë edhe vrasjet që i ka kryer Bedri Krasniqi.

Bedri Krasniqi, i dënuar me 27 vjet burg për vrasjen e dy policëve Sebahate Tolajt dhe Jusuf Haklajt, dhe i dënuar me 17 vjet burg për rrëmbimin e biznesmenit Azem Morina, pronarin e fabrikës “Gllareva”. Tash, ndaj Bedri Krasniqit ka akuza të reja se ka qenë i përfshirë në vrasjet e vitit 2004, vrasjen e policit Arsim Rrustolli dhe policit të UNMIK’ut, Possible Essuman.

Ky rast ka të bëjë me vrasjen e rëndë të dy zyrtarëve të UNMIK-ut dhe tentim vrasjen e dy zyrtarëve tjerë të UNMIK-ut që ka ndodhur më 23 mars 2004 gjatë trazirave të cilat kishin filluar pas pretendimeve për mbytjen e dy fëmijëve shqiptarë në lumin Ibër në Mitrovicë.

Shkumbin Mehmeti, që nga dita e dënimit e deri tash ka bashkëpunuar me prokurorinë. Tash, bashkëpunëtor i drejtësisë, që po vuan dënimin në Burgun e Sigurisë së Lartë në Dyz, i ra të ballafaqohet me armikun e tij të vjetër, Bedriun.

Që nga Dyzi deri në Prishtinë, udhëtuan së bashku të dy vrasësit. Brenda automjetit, u shkëmbyen edhe kërcënimet. Kështu të paktën ka thënë Shkumbin Mehmeti.

Ai ka thënë se është kërcënuar nga Bedri Krasniqi dhe pretendoi se Krasniqi e ka kërcënuar më familje, duke i thënë se e di vendndodhjen e tyre dhe e di adresën ku ata jetojnë.

Arsye për këtë, Mehmeti ka dhënë se po i kërkohet të heqë dorë nga dëshmitë për disa raste të vrasjeve që kanë ndodhur pasluftës në Kosovë.

Por, burimet e Gazetës Express brenda Burgut thonë se krejt kjo ngjarje ka ndodhur për shkak të një sexhadeje. Sexhadja është tepih në të cilin myslimanët i falin vaktet e tyre.

“Zyrtarët nuk i kanë leju me i marr sexhadet me veti në Gjykatë që ata me falë vaktin e drekës, edhe e kanë ba qështu të madhe”, ka thënë burimi i Express për këtë ngjarje.

Megjithatë, zyrtari që ishte përgjegjës për transportin e të burgosurve nga Burgu i Sigurisë së Lartë deri në Gjykatën Themelore të Prishtinës, kishte lejuar që të dy të vrasësit të futeshin në të njëjtin automjet të transportit.

Gazeta Express ka siguruar fotografi të automjetit të ndarë për nga brenda, në mënyrë që të burgosurit të mos shihen dhe preken, megjithatë, ata mund ta dëgjojnë njëri tjetrin duke folur, edhe pse të ndarë fizikisht.

Avokati i Shkumbin Mehmetit, Besian Syla, ka thënë për Gazetën Express se klienti i tij është kërcënuar seriozisht nga Bedri Krasniqi ditën e enjte gjatë këtij transportimi.

Në njoftimin për media që e kanë dërguar nga Shërbimi Korrektues i Kosovës, ku u bë e ditur për suspendimin e zyrtarit lidhur me këtë rast, u përmend edhe automjeti transportues i ndarë për nga brenda.

“…dhe përkundër faktit se të burgosurit e apostrofuar në këtë rast janë transportuar me automjet të dedikuar për Rrezikshmëri Shumë të Lartë, automjeti transportues është i ndarë në dy pjesë, ku të burgosurit nuk mund të kenë kontakt mes tyre”, u tha në njoftimin e SHKK.

Seanca për të cilën u nisën të dy për në Gjykatën Themelore të Prishtinës, ka të bëjë me vrasjen e vitit 23 mars 2004, kur një patrullë e UNMIK’ut ishte sulmuar në Podujevë nga një grup i personave.

Aty, u vra vozitësi i veturës, polici i UNMIK’ut, Possible Essuman dhe zyrtari i Policisë së Kosovës, Arsim Rrustolli, i cili ishte në ulësen përpara të udhëtarit.

Sipas aktakuzës së Prokurorisë, ndaj tyre ishte gjuajtur me kallashnikov me 108 plumba.

Reportazh | Burgu i sigurisë së lartë

Website: https://www.televizioni7.com Facebook: https://www.facebook.com/televizioni7 Instagram: https://www.instagram.com/televizioni7

Te fundit


Kthehu lart