Brenda avionit “të së ardhmes” me ekrane TV në vend të dritareve

AutoTech

Gazeta Express

02/10/2025 20:48

Është zbuluar një avion futuristik prej 14.5 milionë paundësh me ekrane TV në vend të dritareve.

Avioni, i quajtur Phantom 3500, do të përdorë teknologjinë në pjesën e jashtme për të ofruar pamje imersive.

Krijuesit, Otto Aerospace, planifikojnë ta lansojnë avionin në vitin 2027. Ai gjithashtu ka një sipërfaqe jashtëzakonisht të lëmuar, që përmirëson rrjedhën laminar të avionit – duke ulur ndjeshëm rezistencën dhe rritur efikasitetin e karburantit dhe performancën.

Pa dritare që e ngadalësojnë avionin, përdorimi i karburantit pritet të jetë ekonomik – rreth 60 për qind më pak se avionët tradicionalë – si dhe rritet autonomia.

Sistemi me kamera të avancuara do të ofrojë pamje në kohë reale të jashtme të avionit.

Pasagjerët do të gjejnë një kabinë dy metra e lartë, që ofron hapësirë të mjaftueshme për nëntë persona të udhëtojnë komod, ndërsa në kabinën e pilotit do të ketë teknologji të avancuar dhe avionikë të gjeneratës së ardhshme për kontroll preciz.

Otto Aerospace tha: “Pasagjerët do të shijojnë pamje mahnitëse dhe të pandërprera të qiellit dhe peizazhit, duke përfituar gjithashtu nga aerodinamika e përmirësuar dhe efikasiteti që vjen me dizajnin e plotë të rrjedhës laminar.”

Kompania private e avionëve FlexJet ka porositur tashmë 300 njësi të Phantom 3500.

Otto Aerospace tha se qasja e tyre në aviacion fokusohet në “rilidhjen e ekonomisë së aviacionit privat dhe të biznesit me sisteme të thjeshtuara, përdorim më të ulët të karburantit dhe mirëmbajtje të lehtësuar.”

Gjatë një fjalimi në Paris Air Show më herët këtë muaj, CEO Paul Touw njoftoi objektivin ambicioz për ta futur avionin në përdorim deri në vitin 2030.

“Phantom 3500 është rezultat i inovacionit të pakompromis dhe mendimit të guximshëm,” tha Touw.

“Duke arritur neutralitetin e karbonit 20 vjet përpara objektivit të vitit 2050, ne jo vetëm po plotësojmë pritshmëritë – Otto po riformëson atë që është e mundur në aviacion.

Është një hap transformues drejt një të ardhmeje ku teknologjia më e avancuar dhe qëndrueshmëria ecin dorë për dore.”

Otto planifikon të zhvendosë selinë dhe të investojë rreth 340 milionë paund në një fabrikë të re prodhimi në Cecil Airport, Jacksonville.

Testimet fillestare të fluturimit janë të planifikuara për fillim të vitit 2027, me certifikim dhe hyrje në shërbim të synuar për 2030.

Më herët këtë vit, United Airlines bëri një lëvizje të madhe drejt së ardhmes së fluturimit duke nënshkruar marrëveshje për të blerë deri në 200 avionë të rinj revolucionarë nga kompania start-up e aviacionit, JetZero.

Këta avionë të rinj, të quajtur JetZero Z4, janë dizajnuar për të ulur emetimet për 50 për qind duke ofruar një përvojë të përmirësuar për klientët – dhe ata mund të fillojnë të zëvendësojnë avionët aktualë të United deri në vitin 2030.

Ndërkohë, inxhinierët janë frymëzuar të zhvillojnë një zgjidhje të mundshme për avionin anti-aksident, vetëm tre muaj pas katastrofës së Air India.

Koncepti, i quajtur Project Rebirth, është një sistem i adaptuar avionësh që përdor airbag-e masive, të ngjashme me ato të makinave.

Sensorët dhe softueri me AI mund të zbulojnë kur një aksident po ndodh, duke aktivizuar menjëherë airbag-et në hundë, bark dhe bisht. /GazetaExpress/