Braçe e pranon: Tregu i hidrokarbureve gëlon në paligjshmëri


Gazeta Express
22 Korrik 2019 17:12

Zv/kryeministri Erion Braçe i ftuar në Top Talk, pranoi se tregu i hidrokarbureve është zhytur në paligjshmëri.

Ai sjell shembuj të kontrolleve që janë zhvilluar së fundmi në rajonin Tiranë-Durrës dhe ku rezulton se shumica e pikave të tregëtimit të karburanteve aplikonin sistemin fiskal ne gjendje manuale dhe jo automatike, me qëllim shmangien fiskale.

“Tregu i Hidrokarbureve është një nga tregjet ku paligjshmëria ka gëluar. Për fat të keq nga një kontroll i organizuar në rajonin kyç për ekonominë kombëtare por edhe për shërbimet në veçanti siç është rajoni Tiranë-Durrës, ka rezultuar një shumicë dërrmuese e pikave të tregtimit me shumicë por edhe me pakicë të karburanteve me sistemin fiskal në gjendjen manuale, e palejueshme nga ligji , pra jo në sistemin automatik dhe kjo hedh hije të rënda dyshimi jo vetem për transmetimin në kohë reale të gjithë transaksioneve me vlerën  e plotë të tyre të kryer, por në krahun tjetër për një veprimtari kriminale të organizuar me qëllim shmangien fiskale”

Po kush janë te përfshirë në këtë aktivitet të paligjshëm? Braçe nuk nguron të tregojë gishtin

“Për fat të keq janë përfshirë jo vetëm sipërmarrjet, por janë përfshirë kompanitë e kasave, janë përfshirë kompani të tjera të paligjshme”

Më tej zv/kryeministri Braçe bën me dije se për këtë ngjarje ka nisur një hetim penal.

Te fundit


Kthehu lart