Bordi i RTK’së pasi dështoi ta zgjedhë drejtorin, tenton të dalë nga situata duke kërkuar interpretim ligjor


Gazeta Express
19 Prill 2019 17:17

Sot bordi i RTK-së ka votuar në mënyrë të hapur për kandidatët që po pretendojnë të marrin postin e drejtorit të mediumit publik në Kosovë. Por, kandidati që i kishte gjasat më të mëdha, Ngadhnjim Kastrati, ka marrë gjashtë vota, mëson Gazeta Express, të cilit i duhet edhe një për t’u emëruar në këtë pozitë.

Kryetarja e bordit të RTK-së, Afërdita Maliqi, tha për Gazetën Express se për zgjedhjen e drejtorit do të kërkohet interpretim ligjor. Këtë do ta bëjë Sekretaria e Kuvendit të Kosovës. Sipas Maliqit, ligji është i paqartë.

Por, Neni 32 “Kushtet për emërim dhe shkarkim të Drejtorit të Përgjithshëm” megjithatë është mjaftë i qartë pasi nga 11 anëtarët e bordit sa janë, që zgjedhja të konsiderohet valide duhet të votojnë 2/3 ose 7 anëtarë të bordit.

“Drejtori i Përgjithshëm i RTK-se emërohet dhe shkarkohet me 2/3 e votave të anëtarëve të Bordit. Mandati i tij do të jetë tri (3) vjet me mundësi të rizgjedhjes në bazë të konkursit, vetëm edhe për një mandat pasues” thuhet në Nenin 32 pika 3 e ligjit për RTK’në.

Por, duket se një pjesë e bordit nuk po do që të hapet konkurs i ri, pasi që kjo është hera e tretë që po dështon zgjedhja e Drejtorit të Ri të RTK’së.

Prandaj atë e kanë referuar këtë cështje për interpretim ligjor tek sekretari i Kuvendit Ismet Krasniqi.

Ajo ka thënë se votimi ka qenë i hapur. Gazeta Express merr vesh që anëtarja e Bordit Naile Demiri nuk ka votuar fare.

“Bordi i Radio Televizionit të Kosovës (RTK) duke u bazuar në nenin 30 pika 7 të Ligjit të RTK-së sot ka votuar në mënyrë të hapur për kandidatët për Drejtor të Përgjithshëm. Kandidati i pare ka marre 6 vota për dhe një kundër. Bazuar ne Nenin 30, pika 4, ku thotë se “kuorumi mbledhjeve të Bordit është gjashtë (6) anëtarë, dhe meqenëse neni 32.3 i Ligjit të RTK-së është i paqartë rreth 2/3 të anëtarëve, Bordi ka vendosur që të kërkojë interpretim ligjor për këtë nen. Pas marrjes së interpretimit ligjor, Bordi do ta konstatojë gjendjen”, ka thënë Maliqi për Gazetën Express.

Artikull i sponsoruar

Te fundit


Kthehu lart