Besnik Tahiri i tronditur nga faqet përkrahëse të LDK-së që e fyen Saranda Bogujevcin

Gazeta Express

23/11/2020 23:42

Zëvendëskryeministri i parë i vendit, Besnik Tahiri ka thënë në DPT te Fidani në T7 se asnjë qeveri nuk mund ta nënvlerësoj temën e të pagjeturve apo çfardo teme që lidhet me luftën e UÇK-së derisa po komentone deklaratën e zëvendëskryeministrit të dytë të Kosovës, Driton Selmanajt i cili tha se “jemi lodhë me kësi qasje”.

Tahiri tha se Selmanaj realisht nuk i referohet personit në fjalë por që sipas tij deklarata e tij mori diskursin publik.

“Këto çeshtjet që shkaktojnë dhimbje të mëdha në shoqëri duhet të trajtohen me seriozitet. Unë e kam dëgju më kujdes deklaratën e Selmanajt, ai realisht nuk i referohet personit ne fjalë por deklarata e tij mori diskursin publik”, ka thënë Tahiri.

Ai komentoi postimin nga një faqe që mbështet Lidhjen Demokratike të Kosovës ku ishte publikuar një fotografi e deputetes Bogujevci me Ivica Daçiqin gjatë një ekspozite në Beograd në vitin 2013.

Në mbishkrimin e kësaj fotografie ku deputetja Bogujevci i tregon për krimet që ka kryer ushtria serbe Daçiqit, simpatizantët e kanë quajtur Bogujevcin “turp i secilit të zhdukur”.

“Këto janë çmenduri të llojit të vetë, këta njerëz nuk janë në tokë të bukës. Nuk ka asnjë qeveri me e nënvlerësu temën e të pagjeturve apo çfardo teme që lidhet me luftën e UÇK-së janë do baza të paprekshme. Si udhëheqës të shtetit duhet të jemi shumë të kujdesshëm”, deklaroi Tahiri./Gazeta Express/