I mandatuari për kryeministër nga LDK-ja, Avdullah Hoti, ka shprehur ngushëllime pas vdekjes së dy minatorëve në minierën e Artanës.
Hoti ka shkruar në Facebook se një inxhinier dhe një xehetar u shndërruan në shembull flijimi për të mirën e vendit, raporton Gazeta Express.
“Të gjithë jemi tronditur nga lajmi i kobshëm i shuarjes së jetës së dy bashkëqytetarëve tanë, z. Idriz Gërbeshi dhe z. Haki Arifaj, si pasojë e shembjes së dheut në minierën e Artanës.
Sot, një inxhinier dhe një xehetar yni, në vendin e punës, u shndërruan në shembull flijimi për të mirën e vendit”, ka shkruar Hoti në Facebook.
Minatorët të cilët kanë mbijetuar tashmë janë nxjerrë nga miniera, ndërsa nga Forca e Sigurisë së Kosovës do të nxirren edhe dy trupat e pajetë.
Punëtorët që humbën jetët në minierë janë një xehetar dhe një inxhinier, të moshave 50 dhe 51 vjeç. /Express/