As sot s’ka takim të grupeve punuese të VV-së dhe LDK-së për harmonizim të programeve


Gazeta Express
14 Tetor 2019 14:42

Edhe pse ende nuk janë numëruar të gjitha votat që e përcaktojnë fituesin e zgjedhjeve të gjashtë tetorit, tashmë kanë filluar bisedimet për formim të qeverisë së ardhshme. Dy partitë e radhitura të parat, Vetëvendosje e LDK, pas takimit që patën në nivel të liderëve paralajmëruan se do të emërojnë grupe punuese që do të merren me harmonizim të programeve. Megjithatë, një takim i tillë konfirmohet se nuk do të ndodhë sot, shkruan Gazeta Express.

LDK-ja e Isa Mustafës e Vetëvendosja e Albin Kurtit, qysh prej kohës kur dështuan në krijim të një koalicioni parazgjedhor, paralajmëruan se një të tillë do ta vazhdojnë pas zgjedhjeve të jashtëzakonshme.

Tash kur ka një javë që nga gjashtë tetori, nga të dy partitë, ka pasur një takim në nivel të liderëve.

Albin Kurti, kreu i VV-së, së bashku me shefin e shtabit zgjedhor, Besnik Bislimi, javën e kaluar u takua me të parin e LDK-së, Isa Mustafa e kandidaten e kësaj partie për kryeministre, Vjosa Osmani.

Të dy palët pas takimit bënë të ditur para mediave se tashmë janë dakorduar për bashkëpunim, e që në ditët e ardhshme do të mbajnë takime në mes të grupeve punuese që do të krijohen në LDK e VV për harmonizim të programit.

LDK-ja ka thënë tutje, se ajo do të presë edhe që të certifikohen rezultatet, pasi që fituesi do të dihet vetëm kur të përfundojë numërimi i votës së fundit.

Për të biseduar për këtë temë, Mustafa të premten mblodhi edhe kryesinë, nga e cila dolën me qëndrim se do të presin që të numërohen të gjitha votat.

Ai tha se pavarësisht kësaj takimet në mes të grupeve punuese do të vazhdojnë që të bëhet koordinimi i nevojshëm për bashkëpunim.

Megjithatë, një takim në mes të grupeve punuese nuk do të ndodhë sot. Kështu kanë konfirmuar për Gazetën Express nga të dy partitë, LDK e Vetëvendosje.

Deri më tani nga votat që janë numëruar Vetëvendosja vazhdon të radhitet si partia e parë me 25,50%, derisa LDK-ja e Isa Mustafës ka marrë 24,83%. /GazetaExpress/

Te fundit


Kthehu lart