Amianti nga Italia do groposej në Shqipëri, dyshime për grup kriminal që e bënte vazhdimisht këtë rrugë

Gazeta Express

21/02/2020 12:57

Pavarësisht dëshmisë që kanë dhënë të arrestuarit në Vlorë se në tragetin që vinte nga Brindisi nuk kishte asnjë mbetje të rrezikshme për shëndetin dhe se ata kishin përdorur materiale për rikonstruksionin e tragetit, prokuroria nga verifikimet e kryera, mësohet të ketë dalë në rezultatin që nuk është bërë asnjë remont apo servis në traget.

Burime për Report Tv, thanë se dyshimet e hetuesve janë që mbetjet të jenë të një trageti tjetër të kompanisë që i kanë sjellë në Shqipëri.

Por ka edhe dyshime të forta se e gjitha mund të jetë pjesë e një grupi kriminal që ka bërë vazhdimisht rrugë të tilla, duke marrë lëndë të rrezikshme nga Italia, për t’i depozituar në vendin tonë.

Mbetjet dhe materialet që ishin në traget, veçanërisht lënda në mbi 10 fuçi që të arrestuarit thonë se është vaj për motorët e tragetit, nuk kanë asnjë dokumentacion shoqërues nga autoritetet italiane. Fuçitë mbajnë mbishkrimin “eni” të një kompanie nafte dhe gazi me bazë në Romë, por gjithçka sipas hetuesve, dyshohet të ketë ardhur e kamufluar. Për këtë, rolin kryesor dyshohet ta ketë kompania e pastrimit “Delfini 1”, administratorja e të cilës ka rënë në pranga.

Dyshohet që këto lëndë të vinin në Shqipëri të kamufluara si produkte pastrimi kimike, pra me letra dhe dokumentacione të kësaj kompanie, çka plotëson edhe faktin se përse mungojnë dokumentet shoqëruese të mallit të pretenduar vaj për motorin e tragetit.