Roma rikthehet në Champions, pas shtatë sezonesh mungesë

Futboll

Gazeta Express

24/05/2026 22:57

Roma siguroi vendin e tretë në Serie A pas një fitoreje 2-0 ndaj Hellas Veronas, duke siguruar kualifikimin në Ligën e Kampionëve.

Ndeshja ishte e ekuilibruar në pjesën e parë, me Romën që kontrollonte posedimin, por pa krijuar shumë raste të pastra, ndërsa Verona ishte e rrezikshme në kundërsulme dhe mbylli mirë hapësirat.

Situata ndryshoi në fillimin e pjesës së dytë kur Verona mbeti me 10 lojtarë pas kartonit të kuq të Nicolás Valentino.

Pak më vonë, Roma fitoi penallti pas një prekje me dorë të Kieron Bowie, por Donyell Malen fillimisht e humbi, para se të rikthehej dhe të shënonte pas asistit të Paulo Dybala.

Pas golit të parë, Roma mori kontrollin e plotë të lojës dhe Stephan El Shaarawy vulosi fitoren me golin e dytë.

Me këtë sukses, Roma përfundon sezonin fuqishëm, duke fituar 6 nga 7 ndeshjet e fundit dhe duke siguruar një vend në elitën e futbollit europian për sezonin e ardhshëm.

Roma për herë të fundit në Ligën e Kampionëve ishte në sezonin 2018/19./GazetaExpress/