Tamagotchi rikthehet pas 30 vitesh

AutoTech

Gazeta Express

24/05/2026 14:59

Tamagotchi, lodra ikonike e viteve ’90, është rikthyer në një version të ri përmes një bashkëpunimi mes Casetify dhe Bandai America.

Koleksioni i ri përfshin kasa telefoni, mbajtëse për kufje, rripa, varëse dhe aksesorë të tjerë teknologjikë të frymëzuar nga estetika nostalgjike e kafshës digjitale. Pjesë e lançimit është edhe një pajisje ekskluzive Tamagotchi me dizajn të personalizuar nga Casetify, me çmim rreth 43 paund.

Tamagotchi origjinal u lançua në vitin 1996 dhe u kthye shpejt në një fenomen global. Emri vjen nga fjala japoneze “tamago”, që do të thotë vezë, dhe fjala angleze “watch”. Lodra funksiononte si një kafshë digjitale që kërkonte kujdes të vazhdueshëm nga përdoruesi.

Fëmijët duhej ta ushqenin, ta pastronin, t’i jepnin ilaçe kur sëmurej dhe të ndiqnin nivelet e urisë e lumturisë. Versionet e para nuk kishin opsion pauze, ndaj shumë nxënës shpesh shpërqendroheshin në shkollë duke u përpjekur ta mbanin gjallë Tamagotchi-n e tyre. Për këtë arsye, disa shkolla e ndaluan lodrën.

Megjithatë, Tamagotchi u vlerësua edhe për aftësinë për të nxitur ndjenjën e përgjegjësisë dhe empatisë te fëmijët. Deri më sot, janë shitur mbi 100 milionë njësi në mbarë botën.

Koleksioni Tamagotchi x Casetify pritet të dalë në shitje më 29 maj, me çmime që variojnë nga 14 deri në 95 paund. /GazetaExpress/