Klinika me AI që po ndryshon fertiliteti

AutoTech

Gazeta Express

24/05/2026 14:49

Klinika britanike “Avenues”, e para në Mbretërinë e Bashkuar që përdor inteligjencën artificiale në trajtimet e fertilitetit, po sjell një qasje të re për çiftet që përballen me infertilitetin.

E vendosur në Londër, klinika përdor teknologji të avancuara me AI pothuajse në çdo fazë të trajtimit – nga përzgjedhja e spermës deri te analiza e embrioneve dhe ekografive.

Sipas specialistëve, kjo metodë po ndihmon shumë pacientë të gjejnë përgjigje për infertilitetin e pashpjegueshëm dhe të realizojnë ëndrrën për t’u bërë prindër.

Një çift, që kishte kaluar më shumë se 10 vite në përpjekje të pasuksesshme për të pasur fëmijë, tha se teknologjia e përdorur nga klinika “e bëri të mundur atë që dukej e pamundur”. Ata treguan se pas shumë zhgënjimesh, AI i ndihmoi më në fund të mbanin foshnjën e tyre në krahë.

Themeluesja e klinikës, Dr. Cristina Hickman, shpjegoi se inteligjenca artificiale nuk synon të zëvendësojë mjekët, por të ndihmojë në marrjen e vendimeve më të sakta dhe më të personalizuara për pacientët.

Në fazën fillestare, AI analizon mijëra të dhëna njëkohësisht, përfshirë rezervën ovariane, cilësinë e spermës, hormonet, historinë mjekësore dhe ekografitë. Më pas teknologjia ndihmon në përcaktimin e trajtimit më të përshtatshëm dhe në optimizimin e medikamenteve.

Një nga aspektet më të avancuara është analiza e vezëve, spermës dhe embrioneve në laborator. Sipas klinikës, AI mund të identifikojë modele biologjike që syri i njeriut nuk i dallon. Teknologjia mund të parashikojë me deri në 96 për qind saktësi nëse një embrion do të arrijë fazën e blastocistit.

Klinika pretendon se rezultatet e saj janë më të larta se standardet tradicionale të IVF-së, ndërsa një tjetër avantazh është edhe ulja e kostos. Paketa e tyre “Fair IVF” kushton dukshëm më pak se trajtimet private tradicionale në Britani.

Një nga historitë më të veçanta ishte ajo e një çifti ku mashkulli vuante nga globozoospermia, një formë shumë e rrallë infertiliteti mashkullor. Falë një kombinimi teknikash me AI dhe metodës “ICSI SPARK”, çifti arriti të kishte fëmijë biologjik me materialin e tyre gjenetik.

Sipas ekspertëve, e ardhmja e fertilitetit do të lidhet gjithnjë e më shumë me integrimin e inteligjencës artificiale, shkencës dhe kujdesit klinik për të ofruar trajtime më të sakta dhe më efektive për pacientët. /GazetaExpress/