Nata e yjeve, mbyllet Festivali I Cannes

Yjet

Gazeta Express

24/05/2026 10:30

Festivali i Filmit në Kanë po shkon drejt mbylljes me ceremoninë tradicionale të ndarjes së çmimeve, pas dy javësh të mbushura me premiera, tapete të kuq, yje të kinemasë dhe debate mbi të ardhmen e industrisë së filmit.

Një nga momentet më të veçanta të këtij edicioni ishte ribashkimi i kastit origjinal të “The Fast and the Furious”. Vin Diesel, Michelle Rodriguez dhe Jordana Brewster u ngjitën në skenë për të shënuar 25-vjetorin e filmit dhe për të nderuar kujtimin e aktorit të ndjerë Paul Walker.

Vëmendje mori edhe filmi spanjoll “La Bola Negra”, i cili u prit me 16 minuta duartrokitje nga publiku, duke shënuar një nga momentet më të komentuara të festivalit.

Aktori spanjoll Javier Bardem tërhoqi interesin e mediave me deklaratat e tij politike, ndërsa John Travolta u nderua me çmim për arritje jetësore.

Në tapetin e kuq spikatën paraqitjet e Demi Moore dhe Bella Hadid, ndërsa inteligjenca artificiale u kthye në një nga temat kryesore të diskutimit. Artistë dhe producentë shprehën shqetësime për ndikimin e AI në kinematografi, teksa Peter Jackson paralajmëroi për rreziqet e teknologjisë në krijimtarinë artistike.

Festivali solli gjithashtu prodhime të reja që pritet të tërheqin vëmendjen ndërkombëtare, mes tyre “Club Kid”, komedia-horror “Teenage Sex and Death at Camp Miasma” dhe “Minotaur” i regjisorit rus Andrey Zvyagintsev. /GazetaExpress/