Greenwood drejt Fenerbahçes?

Futboll

Gazeta Express

24/05/2026 9:19

Gara për presidentin e Fenerbahçes ka marrë një kthesë të bujshme, pasi kandidati Hakan Safi po përgatitet të prezantojë një “paketë mega” për ta transformuar klubin.

Sipas raportimeve në Turqi, Mason Greenwood dhe legjenda e Milanit, Paolo Maldini, janë pjesë kyçe e projektit ambicioz të Safit për rikthimin e Fenerbahçes në majat e futbollit turk.

Gazetari Levent Umit Erol raporton se Safi pritet ta shpallë Greenwoodin si goditje të madhe në merkato, në përpjekje për të fituar mbështetje ndaj rivalit Aziz Yildirim.

Sulmuesi anglez, aktualisht pjesë e Marseille, shihet si transferimi që mund ta ndezë entuziazmin e tifozëve. “Një yll nuk mjafton për Fenerbahçen time”, ka deklaruar Safi.

Ndërkohë, Maldini pritet të mbërrijë në Stamboll dhe, nëse Safi fiton zgjedhjet, italiani mund të marrë një rol të rëndësishëm drejtues dhe përfaqësues në klub.

Greenwood vjen pas një sezoni shumë të mirë në Francë, ku regjistroi 26 gola dhe 11 asistime në 45 ndeshje me Marseille. Megjithatë, vetë 24-vjeçari së fundmi ka deklaruar se dëshiron të qëndrojë në Ligue 1.

“Shpresoj të qëndroj. Ligue 1 është një kampionat i mrekullueshëm”, tha Greenwood, pavarësisht spekulimeve për një largim të mundshëm gjatë verës. /GazetaExpress/