Shpetim Bunjaku risjell mitin e “MEDUSA” në një editorial mbi rilindjen dhe transformimim

Rozë

Gazeta Express

22/05/2026 21:13

Në historinë e miteve të lashta, Medusa është portretizuar si një figurë e frikshme, e mallkuar dhe monstruoze. Por në vizionin artistik të Shpëtim Bunjaku, miti ndryshon formë. Ajo nuk është më simbol i frikës, por një qenie e rilindur, një figurë poetike që rikthen narrativën e saj dhe e transformon dhimbjen në bukuri.

E vendosur mes ëndrrës dhe mitit, Medusa paraqitet si një hyjni e brishtë dhe njëkohësisht e fuqishme. Koleksioni eksploron tensionin mes delikatesës dhe forcës, njerëzores dhe hyjnores, monstruozitetit dhe estetikës sublime.

Në këtë univers artistik, Medusa jeton brenda një altari imagjinar. Ajo shfaqet si një balerinë e heshtur, elegante dhe dramatike, ku gjarpërinjtë e saj nuk përfaqësojnë më mallkim, por lulëzojnë në tulipanë si simbol i rilindjes, pastërtisë dhe feminitetit.