Deputeti Murat: Qeveria po shkel përfaqësimin e drejtë të turqve

Maqedoni

Gazeta Express

06/04/2026 10:18

Deputeti Salih Murat ka reaguar ndaj qeverisë së koalicionit të udhëhequr nga VMRO-DPMNE, në bashkëpunim me VLEN dhe ZNAM, duke e akuzuar për diskriminim të vazhdueshëm dhe të qëllimshëm ndaj komunitetit turk në Maqedonia e Veriut.

Sipas Muratit, që nga themelimi i shtetit, e sidomos gjatë qeverisjes aktuale, komuniteti turk po përballet me përjashtim sistematik në pothuajse të gjitha institucionet shtetërore. Ai thekson se qeveria po injoron parimin kushtetues për përfaqësim të drejtë dhe proporcional, duke shpërfillur amendamentet kushtetuese, vendimet e gjykatave, raportet e Ombudspersonit dhe dokumentet ndërkombëtare.

Duke paraqitur, sipas tij, shembuj konkretë të kësaj situate, Murat theksoi se:

• në 64 pozita të larta shtetërore nuk ka asnjë përfaqësues turk,
• në Presidencë vetëm një punonjës është turk,
• në 50 punësime në Kuvend nuk është përfshirë asnjë turk,
• në Gjykatën Kushtetuese dhe në emërimet e reja nuk ka asnjë turk,
• nga 177 emërime parlamentare vetëm një është turk,
• në mesin e rreth 15 ambasadorëve të rinj nuk ka asnjë turk,
• në kabinetin e kryeministrit nuk ka asnjë këshilltar turk.

Ai shtoi se në rreth 870 nga 1,200 institucione shtetërore nuk ka asnjë të punësuar turk, duke e cilësuar këtë si dëshmi të një politike të planifikuar përjashtuese.

Sipas Muratit, kjo gjendje nuk është rastësi, por rezultat i një strategjie të qëllimshme që, sipas tij, e ka bërë praktikisht të pavlefshëm ligjin për përfaqësim të drejtë dhe proporcional, duke pamundësuar përfshirjen e komunitetit turk në institucionet publike.

Në fund, ai paralajmëroi se të gjitha institucionet dhe individët që mbështesin këtë qasje do të mbajnë përgjegjësi historike, duke theksuar se heshtja ndaj diskriminimit përbën gjithashtu një formë bashkëpërgjegjësie.