100 policë dhe efektivë të forcave speciale ‘pushtojnë’ Elbasanin

Gazeta Express

20/02/2020 23:25

Një operacion masiv me qëllim goditjen e veprimtarisë kriminale po zhvillohet në qarkun e Elbasanit.

Dosja.al ka mësuar se operacioni po zhvillohet nga ana e drejtorisë së policisë së Elbasanit, ndërkohë të përfshirë janë rreth 100 punonjës policie, RENEA-t, efektivë të FNSH-ve, “Shqiponjat”, oficerë të Krimeve të Rënda dhe atij ekonomik.

Operacioni është shtrirë në të gjithë qarkun dhe ka si qëllim goditjen e lojrave të fatit dhe basteve të paligjshme. Gjithashtu në fokus janë edhe personat me precedentë kriminalë në qytet, ndaj të cilëve Gjykata e Elbasanit ka vendosur masën “arrest me burg” në mungesë.

Efektivët e Policisë kanë hyrë në çdo “skutë” për të gjetur gjurmë apo sende që përdorën për lojrat e paligjshme. Ata gjithashtu do t’u kërkojnë pronarëve të lokaleve kamerat e sigurisë. 

Kontrolle paralele po zhvillohen edhe në Tiranë e Laç. Forcat e Rendit po kontrollojnë në çdo lokal për pika të ndryshme ku ushtrohen lojëra të paligjshme të fatit dhe veprimtari të tjera. Aksioni i Policisë së Shtetit pritet që të vijojë gjatë gjithë natës dhe pritet që të ketë mbi 50 arrestime.