Një grup prej katër personash kanë sulmuar fizikisht imamin e xhamisë në Tunelin e Parë të Mitrovicës. Policia e Kosovës ka njoftuar se rasti është raportuar të ketë ndodhur rreth orës 12:20 min, pas faljes së namazit të drekës, në xhaminë e Tunelit të Parë.

“Policia ka takuar ankuesin, Imamin e xhamisë, i cili ka njoftuar se ishte sulmuar fizikisht nga grupi i katër personave të njohur për të, menjëherë pas faljes së namazit të drekës. Ai më tutje ka deklaruar se sulmuesit e tij, fillimisht kanë pritur rastin që personat e tjerë që gjendeshin në xhami të largohen nga aty ndërsa më pas të njëjtit e kanë ftuar për bisedë imamin brenda xhamisë. Sulmuesit, më parë kanë mbyllur derën hyrëse të xhamisë dhe më pas, në grup e kanë sulmuar fizikisht imamin duke mos lejuar që persona të tjerë të hynin në xhami për të ndaluar sulmuesit”, thuhet në njoftimin e policisë së Kosovës.

Sipas policisë, imami i xhamisë ka pësuar lëndime të dukshme sipërfaqësore në pjesë të fytyrës dhe të kokës ndërsa për ndihmë të parë është trajtuar në shtëpinë e shëndetit në Mitrovicë.

“Imami është dërguar në QKUK Prishtinë për një kontroll të detajuar pasi ankohej në dhimbje koke si rezultat i goditjeve të pranuara”, thuhet më tej në njoftimin e policisë.
Policia ka mbledhur informatat mbi sulmuesit e imamit dhe është në kërkim të sulmuesve të cilët ende nuk janë lokalizuar. Mësohet se përveç imamit të xhamisë i cili është intervistuar në cilësi të viktimës, policia ka siguruar edhe deklarata të dëshmitarëve të mundshëm të këtij rasti.

“Në bazë të informatave preliminare të rastit të raportuar besohet se motivet e këtij sulmi qëndrojnë prapa kundërshtimit të një grupi të personave për caktimin e tij si imam në këtë xhami”, ka njoftuar policia.

Vet imami i xhamisë në Tunelin e Parë, ka deklaruar se kishte qenë i kërcënuar edhe më parë nga personat e njëjtë si rezultat i kundërshtimeve të disa individëve për caktimin e tij në atë pozitë ndërsa ka njoftuar policinë se ai është Imam legjitim i përzgjedhur nga Bashkësia Islame për ushtrim të detyrës së tij zyrtare.

Shpërndaje artikullin: