Shtëpia botuese Bard Books ka nisur një seri botimesh, të kuruar nga Donika Dabishevci, në kolanën Safo. Në prezantimin e radhës kemi vëllimin “Po të due unë”, të poetes Arjola Zadrima
Arjola Zadrima (1979) ka kryer studimet për gjuhë dhe Letërsi në Universitetin “Luigj Gurakuqi” në Shkodër. Deri tash ka botuar dy libra me poezi.
Veprat e autores: A ban me m’lshue pak rrugë (2006), Carpe Diem (2018).
Temën e dashurisë Arjola Zadrima e shoshit ne librin e saj të fundit me poezi. Poetja i drejtohet tjetrit ose muzës se poezisë ose vetë dashurisë ne veten e tretë. Gjuha e përdorur në poezi është shumë e thjeshtë por tunduese njëkohësisht.
Nganjëherë autorja i shkruan edhe vetës, tek poezia Ditët e mia vërejmë një ton me të lehtë por edhe të ndjeshëm gjithsesi.
Mungesë
Me e dashtë mungesën tande
Pa bza,
Me ta marr puthjen e lamtumirës
Pa kja,
Edhe aromën me ta përpi
Në çast…
Se jeta, njaty asht
Ndër maje gishtash që puthiten
Në rrokje kohësh
A puthje të vjeshta,
Në shtrëngime e lëshime gulshesh.
Në andrra të brishta
Mbas derës së natës ku mbretnin heshtja.
Tash qit kam marrë erë
E di, se dashnia asht ma e fortë se vdekja.
/Arjola Zadrima: “Po të due unë”, botoi “Bard Books”, Prishtinë, 2022
Përgatiti Donjeta Abazi
/Gazeta Express