Ezani këndohet 10 minuta para kohe, shkarkohet hoxha

Lajme

Gazeta Express

04/05/2021 13:54

Një ngatërresë në sistemin e xhamisë u prishi agjërimin banorëve të lagjes Çekmekoj në Stamboll.

Nga objekti i kultit ftesa për namaz e darkës u dëgjua 10 minuta para se të mbyllej agjërimi. Sapo kanë dëgjuar thirrjen e hoxhës, qytetarët kanë hapur iftarin.

Pas 2 minutash, nga mineratë kanë dëgjuar një tjetër thirrje që u kërkonte të mos e përfundonin agjërimin pasi kishte ndodhur një problem teknik në sistemin e regjisë.

Kjo situatë i ka habitur njerëzit të cilët duhet ta shlyejnë prishjen e agjërimit pas përfundimit të muajit të shenjtë. Ky gabim i ka kushtuar vendin e punës hoxhës së xhamisë në Çekmekoj.

Kjo nuk është hera e parë që në Turqi ngatërrohet ora e ezanit. Edhe vitin e kaluar diçka e tillë ndodhi disa herë brenda muajit të ramazanit.