Rreth 420 profesionistë shëndetësorë janë infektuar me koronavirus nga marsi

Gazeta Express

10/07/2020 17:36

Mbi 400 profesionistë shëndetësorë kosovarë janë infektuar me koronavirus që nga fillimi i pandemisë COVID-19. Numri më i madh i të infektuarve janë infermierë, raporton Express.

Zëdhënësi i Ministrisë së Shëndetësisë, Faik Hoti ka publikuar një infografikë lidhur me praninë e COVID-19 në mesin e profesionistëve shëndetësorë, sipas së cilëve janë 222 infermierë të infektuar.

Ndërkohë, numri i mjekëve të sëmurë në institucion shëndetësor ka arritur në 160.

Në infografikë figurojnë se janë të infektuar edhe 24 mjekë e infermierë jashtë institucionit shëndetësor.

Përvec mjekëve e infermierëve, të sëmurë me COVID-19, janë edhe tetë farmacisë, dy teknik të farmacisë dhe dy fizioterapuetë.

Kosova po përballet me shtim të rasteve me Covid-19 prej lehtësimit të masave. Mbrëmë u raportuan 207 raste të reja me këtë sëmundje. Numri total i të prekurve është 4307, ndërsa 2095 persona janë shëruar dhe 94 kanë ndërruar jetë.

IKSHPK kërkon që të respektohen masat e mbajtjes së distancës dhe mbajtjës së maskës që të kalohet sa më shpejt kriza me pandeminë. /Gazeta Express