Kthehu lart

Fuad Ramiqi bëri thirrje për rezistencë, ja provat e Prokurorit (Dokument)

Fuad Ramiqi bëri thirrje për rezistencë, ja provat e Prokurorit (Dokument) Autori: Mentor Gjergjaj GazetaExpress E mërkurë, 16 Nentor 2016 12:20

Arrestimet e disa imamëve në shtator të vitit 2014, Fuad Ramiqi i kishte parë si ushtrim të terrorit ndaj myslimanëve në Kosovë, e për këtë kishte bërë thirrje që të mos rrinë duarkryq. Thoshte se nuk kryen punë as protestat. E këtë, Prokuroria Speciale e Kosovës, dy vite pas, e ka konsideruar si të mjaftueshme për të ngritur aktakuzë ndaj kreut të LISBA-s mbi dyshimet se ka kryer veprën penale “Thirrje për rezistencë”, të dënueshme deri në tre vjet burgim sipas Kodit Penal të Kosovës. Mbrojta e Ramiqit thotë se aktakuza është kryekëput politike, ashtu siç është kontesti, politik, i deklarimeve të klientit të tij. 

“Nuk do të rri duarkryq përballë terrorit që po u bëhet myslimanëve në Kosovë, e më nuk do të bëjnë punë as protestat”. 

Kësaj deklarate të lëshuar nga themeluesi dhe kreu i Lëvizjes Islame "Bashkohu", Fuad Ramiqi, Prokuroria ia bashkoi edhe një tjetër prononcim të tij për një media, po në të njëjtën ditë, kur autoritetet kosovare arrestuan rreth 40 të dyshuar për terrorizëm – në mesin e tyre edhe imamë.

“Vazhdon terrori shtetëror ndaj myslimanëve në veçanti, po edhe ndaj prijësve fetarë, që është një dukuri që nuk mund të imagjinohet, që mund të ndodhë brenda popullit shqiptar, por diktaturat e egra e kanë dëshmuar që mund të ndodhë gjithçka dhe kjo po i ngjan një vendi me diktaturë më të egër që ka ndodhur në historinë e popullit. Sigurisht që do t'i marrim hapat në ditët në vijim, por do ta kemi të qartë me çfarë arsyeje janë bërë këto dhe deri ku do të shkojë ky shtet – pushtet diktatorial”, citon deklaratën e Ramiqit dhënë për një televizion në ditën kur u arrestua edhe imami Shefqet Krasniqi – prokurori Haki Gecaj, në aktakuzën 15-faqëshe kundër Fuad Ramiqit për thirrje për rezistencë, dhe 5 të tjerëve të akuzuar për vepra penale që lidhen me terrorizmin. 

Tutje, Prokurori në aktakuzën e ngritur nga Prokuroria Speciale, pas gati dy vitesh hetim, e që gati kishte kaluar afatet e parapara kohore për zyrtarizim, në analizimin e fakteve pretendon se i akuzuari Ramiqi, si themelues i LISBA-s ka ndikim të madh te masa që kryesisht janë praktikues të fesë islame dhe thirrjet e tij për reagim pas arrestimit të imamëve dhe personave tjerë të dyshuar për implikime në terrorizëm kanë mundur të keqkuptohen. 

“Kjo nuk mund të kuptohet ndryshe, përveç si thirrje për të rezistuar kundër vendimeve të ligjshme të organeve kompetente të ndjekjes qe ishin marrë kundër personave të dyshuar për kryejen e veprave penale”, pohon prokurori Gecaj në aktakuzën që e ngriti më 15 shtator 2016. 

Në arsyetimin e aktakuzës, Prokuroria Speciale përshkruan se rasti ka ndodhur gjatë një periudhe kur shumë të rijnë kosovarë i ishin bashkuar luftimeve në Siri, përkrah dy fronteve terroriste – ‘Al Nussra’ dhe ‘ISIS’. Pas shpalljes të së ashtu quajturit Kalifati Islam në Siri e Irak, thotë aktakuza, është vërejtur një trend në rritje i qytetarëve të Kosovës, të cilët udhëtonin drejt këtyre shteteve. 

“Në përgjithësi, shkuarja e këtyre personave në Siri është bërë në baza individuale dhe grupe të vogla individësh me të njëjtën ideologji dhe si arsyetim përdoren nevojën dhe obligimin për “Xhihad”, “në emër të Zotit dhe kundër së keqes”, përshkruan Prokurori historikun e periudhës kur Ramiqi lëshoi deklaratat e tij “thirrëse për rezistencë”. 

Akuzën për “thirrje për rezistencë” prokurorit ia ka mohuar vetë i akuzuar Fuad Ramiqi, në mbrojtjen e tij të dhënë para Prokurorisë Speciale të Kosovës, thotë aktakuza. Aty përmendet se Ramiqi ka pohuar se deklarimet e tij janë politike, si drejtues i një partie politike por me baza fetare. 

E të njëjtat pohime, dy muaj pas aktakuzës, i bëri për Gazetën Express, avokati i Ramiqit, Skënder Musa. 

“Unë besoj se deklarimet e klientit tim [Fuad Ramiqi] e kanë kuptimin se nuk do të rrimë duarkryq dhe do të marrim veprimet politike si një parti opozitare politike, edhe pse e vogël. Por në asnjë kohë nuk konsideroj se ka pasur të bëjë me thirrje për ndonjë rezistencë të dhunshme për të dëmtuar rendin Kushtetues të Republikës së Kosovës”, deklaron avokati Musa. 

Ai beson se aktakuza ndaj klientit të tij është kryekëput politike.

“Klienti im e pranon shtetin sekular, se ka kundërshtuar asnjëherë shtetin e ndarë nga feja... Kryekëput mendoj se aktakuza ndaj tij është politike, nuk ka të bëjë asgjë me shkelje të ndonjë dispozite të Kushtetueses, të Kodit Penal apo ndonjë ligji tjetër për fe”, i tha avokati i Ramiqit, Gazetës Express, të martën. 

Aktakuza ndaj Fuad Ramiqit përfshin edhe katër imamë të akuzuar. Për dallim nga kreu i LISBA-s, katër imamët akuzohen nga Prokuroria Speciale për vepra që kanë të bëjnë kryekëput me terrorizmin. Bedri Robaj e Idriz Bilibani akuzohen për kryerjen e veprës penale “Shtyrja për kryerjen e veprave terroriste”, ndërsa Enes Goga e Mazllam Mazllomi për “Nxitje të urrejtjes, përçarjes, mos durimit kombëtar, racor, fetar apo etnik”. (Gazeta Express, gjatë ditëve në vijim do të sjellë detaje edhe për akuzat të cilat rendojnë mbi këta imamë).

E, 15 ditë para se të ngrihet kjo aktakuzë, derisa Fuad Ramiqi ende ishte vetëm në hetime dhe nuk ishte zyrtarizuar beteja e tij ligjore me autoritetet kosovare, misioni i NATO-s në Kosovë – KFOR, s'e kishte fare problem që t’ia hapë dyert "thirrësit për rezistencë" në ceremoninë e ndërrimit të komandës, më 1 shtator 2016. 

“Z. Fuad Ramiqi ishte në mesin e të ftuarve në ceremoninë e ndërrimit të Komandës me 1 shtator. Ramiqi, është lider i LISBA-s (Lëvizja Islamike 'Bashkohu’), dhe ka qenë i ftuar në këtë cilësi”, i kishte deklaruar Gazetës Express, zyra për Informim e KFOR-it. /M.Gj./GazetaExpress/. 

    Data: 16 Nentor 2016 12:20
    Autori: Mentor Gjergjaj

    Të tjera