Kthehu lart

Daçiq: I kërkova Amerikës një 'kombinim' për Kosovën

Daçiq: I kërkova Amerikës një 'kombinim' për Kosovën GazetaExpress

Ministri i Jashtëm i Serbisë, Ivica Daçiq, ka marrë guximin ta këshillojë sekretarin amerikan të Shtetit, Rex Tillerson, se cilët drejtues të Shteteve të Bashkuara duhet të marrin mbi supe ndryshimet në politikën e jashtme të SHBA'së.

“I tërhoqa vëmendjen rreth asaj se ndryshimet në politikën amerikane duhet t'i bëjnë vetëm presidenti, zëvendës-presidenti dhe ministri i Jashtëm, duke marrë parasysh që përfaqësuesit e establishmentit të vjetër nuk mund t’a bëjnë këtë, sepse e mbrojnë politikën e tyre të viteve 1990”, ka thënë Daçiq, për bisedën e shkurtër me Tillersonin në mbledhjen e këshillit të ministrave të OSBE’së në Vjenë.

Daçiq i ka thënë Tillersonit se është e nevojshme të arrihen marrëveshje strategjike, dhe se Serbia është e gatshme të bisedojë më administratën e re amerikane, thuhet në njoftimin e Ministrisë së Jashtme të Serbisë, përcjell gazetametro.

Kryediplomati serb i ka kërkuar SHBA’së të gjejnë interesat e përbashkëta.

Ai ka thënë se i ka kërkuar Tillersonit të shikohet mundësia të gjendet “një kombinim fitues në të cilin do të gjendeshin interesa të përbashkëta, në mënyrë që të arrihet zgjidhja afatgjatë për disa probleme të rajonit, siç është Kosova”.

Ai ka thënë se takimi ishte hapje e dyerve, që në fillim të vitit të ardhshëm të zhvillohet një takim dypalësh me të.

    Data: 07 Dhjetor 2017 18:48
    Autori: GazetaExpress

    Të tjera