Demarkacioni nuk procedohet këtë javë


13/07/2016

Kjo, për shkak se partnerët e koalicionit kanë qëndrime të ndryshme se si duhet menaxhuar procesin.

Burime të gazetës në Qeveri kanë theksuar të martën të mos ketë pasur konsultim paraprak mes partive kryesore në pushtet, në lidhje me qëndrimin e shprehur publikisht nga Sokol Havolli, këshilltar i kryeministrit Isa Mustafa, sipas të cilit marrëveshja do të procedohet gjatë javës, shkruan sot Koha Ditore.

“Nuk votohet në këtë javë”, i ka thënë gazetës një anëtar i Kabinetit qeveritar nga radhët e PDK-së.

“Para procedimit ka nevojë për konsultime politike dhe për konsensus nacional”.

Një tjetër burim ka theksuar se kryeministri Mustafa, i cili drejton LDK-në, është i interesuar që sa më shpejt të vihet për votim demarkacioni, por se për këtë nuk e gëzon mbështetjen e partnerit kryesor në koalicion, PDK-së.

Sipas tij, kryeparlamentari dhe kreu i PDK-së, Kadri Veseli, ka mbërritur të relaksojë raportet me një pjesë të opozitës.

Prandaj, sipas këtij burimi, ai ka për qëllim që kur të vihet në rend dite demarkacioni të evitojë skenat me gaz lotsjellës, të para në seancat plenare gjatë fundvitit të shkuar dhe në këtë vit.

Te fundit nga kategoria


Kthehu lart