Hoti kërkon falje për deklaratën e Selmanajt, por thotë se e vërteta nuk qëndron ashtu

Gazeta Express

23/11/2020 13:24

Kryeministri i Kosovës, Avdullah Hoti, ka komentuar deklaratën e zëvendëskryeministrit Driton Selmanaj për personat e pagjetur.

Kryeministri Hoti vlerëson se deklarata e Selmanajt është shtrembëruar nga persona të caktuar.

“Tema e të pagjeturve është e para që diskutohet, krejt këto tregojnë se sa e përkushtuar është kjo qeveri dhe sa për zemër e merr çështjen e të pagjeturve. Deklaratat që i ka dhënë Selmanaj, po shtrembërohen nga persona të caktuar, nëse do të kishte një element më të vogël në bindje të cilitdo zyrtarë të qeverisë që do të binte ndesh me parimet ose në çfarëdo forme, i bën të ndihen keq familjarët e të pagjeturve, unë menjëherë do kërkoja falje dhe do të merrja masa”, tha Hoti para gazetarëve.

Ai thotë se kërkon falje nëse dikush është ndier keq, mirëpo, sipas tij, e vërteta nuk qëndron ashtu.

“Nëse dikush nga ta është ndier keq, kërkoj falje, por e vërteta nuk qëndron ashtu siç është thënë publikisht”, tha Hoti.

Tutje ai tha se të pagjeturit janë prioritet për qeverinë që e drejton.

Interpelanca e Kuvendit për të pagjeturit, ditën e enjte është përcjellë me shumë tensione, fillimisht pati përplasje mes Arben Gashit të LDK-së e Saranda Bogujevcit të LVV-së, e cila është e mbijetuar e masakrës në luftën e fundit në Kosovë.

Debati vazhdoi edhe nëpër studiot televizive, i ftuar në emisonin “Pressing” në T7, zëvendëskryeministri Driton Selmanaj i tha gazetarit Parim Olluri se “jemi lodhë me kësi qasje”.

Deklarata e tij u shpërnda me të madhe në rrjetet sociale dhe më pas u iniciua edhe një peticion për shkarkimin e tij.

Por Selmanaj doli me një sqarim në profilin e tij në Facebook, me anë të të cilit tha deklarata e tij është thënë “vetëm dhe vetëm në këtë kontekst: MJAFTË më se jemi lodhur me përdorimin e temave tepër të ndjeshme për qëllime tejet të ulëta politike.

Kushdo që provon që me tema të tilla të ndërtoj kauzë politike kundër kundërshtarëve politik, apo të provoj që mbi to të ndërtoj karrierë politike është TURP, TURP që as toka nuk mund ta mbaj”, shkroi ai ndër të tjera.

Ndryshe, kryetari i Lidhjes Demokratike të Kosovës, Isa Mustafa, në një bisedë për Gazetën Express, ka vlerësuar se është gabim inicimi i peticionit për shkarkimin e zëvendëskryeministrit Driton Selmanaj, teksa u bën thirrje për kujdes deputetëve dhe qeveritarëve që flasin për tema të ndjeshme si ajo e personave të pagjetur.

/Gazeta Express/