Katër të vdekur dje nga COVID 19, shkon në 101 numri i përgjithshëm i viktimave

Gazeta Express

12/07/2020 7:27

Sërish ka pasur numër të lartë të rasteve të reja me koronavirus në Kosovë. Vetëm të shtunën janë regjistruar 203 raste të reja, ndërsa katër persona kanë vdekur duke e çuar shifrën e të vdekurve nga koronavirusi në Kosovë në 101.

203 rastet pozitive kanë rezultuar nga testimi i 419 mostrave gjate dites se shtune.

Komuna e Prishtinës i prin edhe një herë listës së rasteve të reja. Të shtunën në kryeqytet u regjistruan 75 raste pozitive. Pas Prishtinës vijnë komuna e Gjilanit me 28 raste, pasuar nga Ferizaj 21 raste, komuna Fushë Kosovë 11 raste, komuna Lipjan 11 raste, komuna Podujevë 8 raste, komuna Viti 6 raste, komuna Mitrovicë 6 raste, komuna Drenas 5 raste, komuna Kamenicë 4 raste, komuna Malishevë 4 raste, komuna Vushtrri 4 raste, komuna Skenderaj 4 raste, komuna Gjakovë 3 raste, komuna Shtime 3 raste, komuna Pejë 3 raste, komuna Obiliq 2 raste, komuna Rahovec 2 raste dhe me nga 1 rast komunat: Deçan, Prizren dhe Shtërpce.

Me 203 rastet e reja numri i përgjithshëm i rasteve pozitive ka arritur në 4715. Të shtunën janë shëruar edhe 71 pacientë duke e çuar numrin e përgjithshëm të të shëruarve në 2227.

Numri i rasteve aktive është 2387.