Kishte sfiduar dekretin e talebanëve i cili ndalonte muzikën dhe kërcimin. Ajo ishte bërë një këngëtare e famshme e muzikës pop, por fundi i saj rezultoi i hidhur.

24 vjeçarja nga Pakistani Ghazala Javed, u vra natën e kaluar, vetëm pak çaste pasi kishte dalë nga një sallon bukurie.

Dy persona në një motor hapën zjarr mbi makinën e këngëtares e cila u ekzekutua me 7 plumba, ndërsa bashkë me të vdiq edhe i ati i cili ishte në timonin e makinës.

Sipas hetuesve siç raporton noa.al, përgjegjësi për vrasjen e saj mund të jetë ish-bashkëshorti.

Mësohet se këngëtarja vetëm 6 muaj pasi ishte martuar kishte zbuluar se bashkëshorti i saj kishte një grua të dytë dhe kështu u kthye te i ati, ndërsa kërkoi divorcin.

Kërkesa e saj në shoqërinë fanatike pakistaneze, të paktën nga një pjesë e mirë e saj u konceptua si e papranueshme, pasi një grua që kërkon divorcin është çnderim për burrin.

Ghazala Javed ishte martuar me Jahangir Khan në vitin 2010 pasi u arratis nga streha talebane në Swat në veriperëndim të Pakistanit, pasi talebanët e ndalonin të këndonte.

Sipas tregimeve të familjarëve të viktimës edhe i shoqi e kishte ndaluar të këndonte.

Vajza e vrarë ishte shumë popullore dhe e dashur në radhët e të rinjve pakestinezë, por karriera e saj ndër vite më shumë ishte penguar nga talebanët të cilët refuzonin muzikën dhe kërcimin, duke e detyruar së bashku me këngëtarë dhe artistë të tjerë, të regjistronin këngë jashtë vendit të tyre.

Sipas policisë thuhet se krahas bashkëshortit të Ghazala Javed, në vrasjen e saj janë përfshirë edhe talebanët.