Koalicione deputetësh

Stabiliteti i Qeverisë së ardhshme do të mbahet nga pjesëza partish apo deputetësh të trafikuar.

Astrit Haraqija e tha të veten, ashtu siç di ai më së mirë - drejtpërdrejt, të hënën, derisa po fliste për rezultatet zgjedhore dhe koalicionet e mundshme pas certifikimit të zgjedhjeve të 12 dhjetorit.

Ish-Ministri i dikurshëm i Kulturës pranoi se Lista Ibrahim Rugova hyn në Qeveri me Hashim Thaçin dhe tha se Uka, djali i Ish-Presidentit Rugova, do të jetë vetë i gjashtë në Parlamentin e ardhshëm të Republikës.

Astrit Haraqija e ka një veti të lindur për të mos u marrë seriozisht nga opinioni, por deklaratat e tij të fundit qartësojnë shumëçka rreth koalicioneve dhe përbërjes së ardhshme të Qeverisë së Kosovës. Konfirmojnë atë që kalkulohet tash e sa kohë nëpër zyrat e partive politike se Qeveria e ardhshme mund të përbëhet nga pjesëza partish, deputetësh të trafikuar dhe koalicionesh nën rrogoz, me parti që kurrë nuk arritën të krijojnë identitet të tyre.

Hyrja në Parlament e Lëvizjes Vetëvendosje! dhe dalja nga Parlamenti e Lidhjes Demokratike të Dardanisë ka ndryshuar krejtësisht skenën politike të vendit dhe, rrjedhimisht, ka komplikuar koalicionet e mundshme qeverisëse.

Por duket se kjo nuk përbën problem për Hashim Thaçin.

Ai është përshtatur në rrethanat e reja.

Kryetari i Partisë Demokratike të Kosovës nuk i sheh më partnerë të tij potencialë vetëm subjektet politike, por edhe grupet e interesit brenda partive që do të jenë pjesë e Parlamentit të ardhshëm.

Në radhë të parë sytë e Kryeministrit janë drejtuar tek Lista Ibrahim Rugova, deputetët e Aleancës Kosova e Re dhe tek disa përfaqësues të Grupit të ardhshëm Parlamentar të Lidhjes Demokratike të Kosovës dhe Lëvizjes Vetëvendosje!.

Por si do të gjenden këta njerëz në përbërjen e ardhshme të Qeverisë?

Faktet e tanishme tregojnë se Hashim Thaçi është i interesuar për koalicion qeverisës me partitë minoritare dhe Aleancën për Ardhmërinë e Kosovës, ku bën pjesë edhe Lista Ibrahim Rugova me gjashtë deputetët e saj - siç po pretendohet që i ka ky subjekt. Në këtë rast, posti i Presidentit do t’i jepej Blerim Shalës, figura më e rëndësishme në AAK. Një Zëvendëskryeministër do t’i jepej minoriteteve apo Listës Ibrahim Rugova. Ministritë dhe përfaqësimi në ndërmarrjet publike, ndërkaq, nuk do të përbënte problem për shkak se PDK do të mund t’ua ndante partnerëve të saj deri në gjashtë ministri dhe ndonjë zëvendësministër, çka do t’i rehatonte edhe grupe e pakënaqura brenda AAK’së apo partive minoritare.

Në një koalicion të tillë, PDK do t’i merrte edhe gjysmën e deputetëve të Aleancës Kosova e Re, duke e shkatërruar në fakt komplet Grupin Parlamentar të Behgjet Pacollit. Eventualisht edhe ndonjë deputetë të Lëvizjes Vetëvendosje! - kam parasysh një grup të vogël të pakënaqurish me drejtuesit e lëvizjes, e të cilët sipas gjitha gjasave do të hyjnë në Parlament.

Opsioni i dytë, dukshëm jo i preferuar i Hashim Thaçit, është një koalicion qeverisës me minoritetet dhe Aleancën Kosova e Re, ku postin e Presidentit do të mund ta merrte Behgjet Pacolli. Në këtë rast do të rriteshin pakënaqësitë brenda PDK’së dhe njëkohësisht deputetë të AKR’së - një apo dy - mund të kalonin në LDK, duke ndikuar në fragjilitetin e Qeverisë së Hashim Thaçit. Njëkohësisht në këto rrethana negocimi i mundshëm me Listën Ibrahim Rugova, gjithnjë nëse ajo ka gjashtë deputetë, do të ishte shumë më i vështirë.

Opsioni i tretë, ai i një koalicioni mes PDK’së dhe LDK’së, duket se nuk ka gjasa as teorike që të ndodhë, megjithëse Hajredin Kuçi në intervistën që dha për Express deklaroi se për ta është i pranueshëm një koalicion i tillë. Hendeku mes dy partive është i madh, në radhë të parë dhe, së dyti, Isa Mustafa duket i vendosur për të mos pranuar assesi një koalicion të tillë. Por mbetet të shihet nëse LDK do të pranojë t’i bindet Kryetarit të saj, pasi që situata është e ndërlikuar meqenëse Isa Mustafa është në pushtet, e të tjerët po i nxjerr në opozitë. Kjo do të nxitë pakënaqësi dhe revolta brenda njerëzve të LDK’së, të cilët s’janë mësuar kurrë që të jenë në opozitë.

Sido që të jetë, një gjë është e qartë.

Qeveria e ardhshme do të mbahet nga pjesëza partish apo deputetësh të trafikuar.