Ministri i Sportit të Shqipërisë, Aldo Bumci, ia ka dorëzuar flamurin ekipit olimpik të Shqipërisë, pjesë e të cilit është edhe kosovarja Majlinda Kelmendi. Peshëngritësja Romela Begaj ka marrë simbolin kombëtar, me të cilin do t’i prijë Shqipërisë gjatë hapjes së Lojërave Olimpike. Gjatë kësaj ceremonie u tha se ekipi olimpik shqiptar në ‘Londra 2012’ nuk do ta përfaqësojë vetëm Shqipërinë, por Kosovën dhe gjithë kombin shqiptar.

Ekipi olimpik i Shqipërisë, pjesë e të cilit është edhe xhudisjta kosovare Majlinda Kelmendi, në një gala-mbrëmje të organizuar në Tiranë e ka marrë flamurin kombëtar shqiptar për ta ngritur në Lojërat Olimpike ‘Londra 2012’, fillimi i të cilave do të bëhet më 27 korrik.

Përveç reprezentuesve shqiptarë, në këtë ceremoni të pranishëm ishin njerëz të sportit të Shqipërisë e Kosovës, ambasadorë të akredituar në Tiranë, por edhe ministri i Sportit të Shqipërisë, Aldo Bumci, dhe ministri i Sportit të Kosovës, Memli Krasniqi.

Në këtë gala-mbrëmje të gjithë thanë se ky ekip në ‘Londra 2012’ nuk do ta përfaqësojë vetëm Shqipërinë, por do ta përfaqësojë edhe Kosovën dhe gjithë kombin shqiptar.

“Falë talentit të tyre, falë vullnetit të tyre, stërvitjes katërvjeçare dhe sakrificës që është e lidhur me të, kanë arritur të kualifikohen me sukses në ‘Londra 2012’ dhe kanë bërë të mundur që flamuri kombëtar shqiptar të valojë në ngjarjen më të madhe sportive në glob. Ju përgëzoj përzemërsisht që na bëni të ndihemi krenarë dhe të bëhemi pjesë e këtij shpirti olimpik”, ka thënë pos tjerash ministri Bumci.

Emocionues ishte edhe fjalimi i ministrit të sportit kosovar, Memli Krasniqi. “Ju, sportistë të ekipi olimpik, të kombit tonë, edhe në të ardhmen do të jemi si dy shtete, por bashkë me një zemër dhe të një gjaku”, ka deklaruar Krasniqi.

Me këtë rast, ministri shqiptar Bumci flamurin kuq e zi ia ka dorëzuar reprezentueses shqiptare Romela Begaj. Peshëngritësja shqiptare Romela Begaj do ta mbajë flamurin kuq e zi në parakalimin e ekipit shqiptar më 25 korrik, gjatë ceremonisë së hapjes së Olimpiadës ‘Londra 2012.

Begaj u premtoi bashkëkombësve të saj se bashkë me reprezentuesit tjerë shqiptarë do ta japin maksimumin nga vetja për t’i përfaqësuar sa më mirë ngjyrat kuq e zi në ‘Londra 2012’.

“Kjo është një dhuratë e madhe për mua. Në emër të gjithë sportistëve të ekipit tonë olimpik dua të them se ua japim fjalën se do ta arrijmë një rezultat sa më të madh në Lojërat Olimpike”, ka thënë Begaj.

Ekipin olimpik të Shqipërisë në ‘Londra 2012’ do ta përfaqësojnë njëmbëdhjetë sportistë: Në peshëngritje: Briken Calja, Daniel Godelli, Endri Karina, Hysen Pulaku dhe Romela Begaj. Në not: Sidni Hoxha e Noel Borshi. Në qitje: Arben Kucana. Në atletikë: Adriatik Hoxha dhe Klodiana Shala. Ndërsa në xhudo: Majlinda Kelmendi.

Xhudisjta pejane iu bashkua ekipit olimpik të Shqipërisë, pasi Komiteti Olimpik Ndërkombëtar (IOC) e refuzoi kërkesën e autoriteteve të sportit kosovar që ajo ta përfaqësojë Kosovën në Olimpiadë. Madje, IOC-ja nuk e lejoi Kelmendin që drejt Londrës të udhëtojë as si sportiste e pavarur dhe kështu Shqipëria mbeti rruga e vetme e saj për t’u prezantuar në ‘Londra 2012’.