“Lagjet veriore të Mitrovicës po përjetojnë këto ditë gëzime të shumta falë donatorëve të ndryshëm që po bëjnë të mundur rindërtimin e shtëpive të shkatërruara gjatë luftës dhe kthimin në pronat e tyre të shqiptarëve të dëbuar me dhunë nga ekstremistët serbë”, ka thënë numri një i Mitrovicës, Avni Kastrati, në ceremoninë e vënies së gurthemelit për ndërtimin e katër shtëpive të reja në Lagjen e Boshnjakëve në veri të Mitrovisës, të cilat do të ndërtohen me mjetet e sigurua në mbrëmjen humanitare “Ndihmo edhe ti”.

Përveç shumë banorëve të këtushëm, në këtë ceremoni kanë marrë pjesë edhe zëvendësministri i Administrimit të Pushtetit Lokal, Basri Musmurati, sekretari i përhershëm i kësaj ministrie, Besnik Osmani, nënkryetari i komunës së Vushtrrisë, Dibran Përçuku, ai i Skënderajt, Fadil Nura, si dhe përfaqësuesit e kompanive që po i rindërtojnë këto shtëpi.

Kastrati ka bërë të ditur se mbledhja e donacioneve të premtuara në mbrëmjen humanitare “Ndihmo edhe ti” po shkon mirë dhe se deri tash mbi 200 donatorë kanë bërë pagesën e mjeteve të premtuara.

Zëvendësministri i Administrimit të Pushtetit Lokal, Basri Musmurati, e quajti shumë inkurajues aktivitetin e rindërtimit të shtëpive shqiptare në lagjet veriore, ndërsa nënkryetari i komunës së Vushtrrisë, Dibran Përçuku, ka thënë se drejtuesit dhe qytetarët e Vushtrrisë urojnë familjarët që po u rindërtohen shtëpitë dhe mbështesin fuqishëm aktivitetin për rindërtimin e të gjitha shtëpive të shkatërruara dhe kthimin e të gjitha familjeve të dëbuara me dhunë në pronat e tyre.

Edhe nënkryetari i komunës së Skenderajt, Fadil Nura, ka thënë se kjo është puna konkrete më e mirë që po bëhet kohëve të fundit për realizimin e të drejtës elementare të njeriut, për të jetuar në pronën e tij.

“Me kthimin e qytetarëve në pronat e tyre në lagjet veriore, nuk po lejohet spastrimi etnik i këtyre lagjeve, andaj edhe shqiptarët që po kthehen këtu për të jetuar, meritojnë mbështetjen edhe më të madhe të institucioneve të shtetit të Kosovës, në mënyrë që të jetojnë sa më me pak brenga”, ka thënë Nura.

Remzi Beqiri, Fatmir Abrashi, Fahredin Ramaxhiku dhe Rexhë Avdiu, shtëpitë e të cilëve filluan së rindërtuari sot, u shprehen të lumtur që po u mundësohet kthimi në pronat e tyre për të vazhduar jetën. Ata kanë thënë se do të qëndrojnë në lagje pa marrë parasysh zhvillimet që do të pasojnë, ndonëse janë optimistë se situata do të përmirësohet gradualisht.

Në anën tjetër, drejtori i Drejtorisë për Shërbime Publike dhe Infrastrukturë, Rasim Veseli, ka pohuar se këto shtëpi janë donacion i kompanive “Haxha Com”, me pronar Haxhi Zejnullahu, “Remo Com”, me pronar Vehbi Mulliqi, “Burimi”, me pronar Burim Fazliu dhe “Zariqi”, me pronar Ahmet Zariqi.

“Edhe kompania ‘Loshi’ është e gatshme që menjëherë të filloj ndërtimin e shtëpisë së premtuar, ashtu sikur edhe ‘Haxha Com’ shtëpinë e dytë të premtuar. Çdo gjë është duke shkuar mirë. Deri tash nuk kemi pasur asnjë problem dhe shpresoj se kështu do të jetë deri në përfundimin e të gjitha shtëpive”, ka thënë, ndër të tjera, Veseli. /kosovapress/