(E plotësuar) Ndërkohë para pak çastesh ministri i Brendshëm i Serbisë, njëherësh mandatari për formimin e qeverisë së re, Ivica Daçiq, ka thënë se xhandarmëria nuk duhet më ta shfrytëzojë betimin në të cilin thuhet se: “Nuk ka Serbi dhe serbë pa Kosovën”.

Daçiq në deklaratën e tij ka thënë se betimi i xhandarmërisë, nuk është zyrtar dhe se ai asnjëherë nuk ka dhënë leje për një gjë të tillë.

Ai ka theksuar se as xhandarmëria e as dikush tjetër, nuk do të mund të bëjë ndonjë vepër që do ta rrezikonte paqen dhe stabilitetin, pa marrë urdhër nga kreu shtetëror. Betimi kontrovers i xhandarmërisë serbe u bë para dy ditësh në një kazermë të Serbisë.

Betimi i xhandarmërisë serbe, pa Kosovën nuk ekzistoj as unë

Pjesëtarët e Xhandarmërisë, njësisë speciale të Ministrisë së Brendshme të Serbisë, kanë marrë sot betim të ri. Pjesa më e madhe e tekstit i është kushtuar Kosovës, pa të cilën, siç thuhet, “nuk ekziston as populli serb dhe Serbia”.

Sipas B92, Xhandarmëria serbe ka betim të ri, e cila është prezantuar dje, kurse autor i tekstit është Bratisllav Dikiq, njeriu i parë i Xhandarmërisë.

Në Xhandarmëri kanë pohuar se njësia e MPB-së sivjet kremton Vidovdanin si kremte të saj, dhe kjo është arsyeja që Kosova gjendet në fokus të betimit.

“Bëhet fjalë thjesht për metaforë. Kemi dashur që në frymën e Vidovdanit të kthehemi në histori dhe t’i kujtojmë trimat e vjetër të Kosovës dhe në përgjithësi atë ditë si ditën e trimave kosovarë dhe në bazë të kësaj kemi thënë se do të fitojmë apo vdesim”, tha zëdhënësja e Xhandarmërisë, Stanica Puzoviq, transmeton koha.

Ajo theksoi se betimi dhe simbolika e ndërlidhjes së Kosovës nuk kanë kurrfarë lidhje me ndërrimin e pushtetit në Serbi.

“Kosova ka qenë gjithnjë e rëndësishme për këtë njësi, që nga formimi i saj deri sot”, shtoi ajo.

Pjesëtarët e Xhandarmërisë dje kanë shënuar 152 vjetorin e formimit.

Xhandarmëria ka në përbërje të saj Komandën, e cila është e vendosur në Beograd, dhe katër njësi – në Beograd, Nish, Kralevë dhe Novi Sad. Këto njësi kanë territorin e vet të përgjegjësisë, por sipas nevojës mund të angazhohen në territorin e mbarë Serbisë.

B92 thekson se mbi 3 000 pjesëtarë të Xhandarmërisë disponojnë me armatim të rëndë, sipas sistematizimit të miratuar para jo shumë kohësh, dhe praktikisht të gjithë ata janë nën komandën e një njeriu. Sipas po këtij sistematizimi, rreth 600 sish i takojnë njësisë speciale, që sipas strukturës është më adekuate me ushtrinë sesa me policinë.

Betimi i Xhandarmërisë:

Kosova është nëna ime,

Origjina ime është në Kosovë,

Të parët e mi janë nga Kosova.

Historia ime është në Kosovë,

Populli im serb është lindur në Kosovë,

Serbia im ka marrë shtat në Kosovë.

Pa Kosovë unë nuk kam nënë,

Pa Kosovë nuk kam origjinë,

Pa Kosovë nuk i kam më të parët,

Pa Kosovë nuk kam histori,

Pa Kosovë nuk ekziston populli im serb,

Pa Kosovë nuk ekziston Serbia ime.

Popull serb, vëllezër dhe motra,

Betohem para Zotit

Do të fitojë ose të vritem me nder,

Për nderin time, për origjinën time,

Për familjen time, për Serbinë time