Kthehu lart

PDK profilizohet si parti e Qendrës së Djathtë

PDK profilizohet si parti e Qendrës së Djathtë
GazetaExpress E diel, 27 Janar 2013 11:40

(E plotësuar) 15:45 Kryetari i porsazgjedhur i PDK’së, Hashim Thaçi, gjatë diskutimeve për ndryshimet në Statut, ka propozuar profilizimin ideologjik të partisë.

“Propozoj që PDK të profilizohet si parti e Qendrës së Djathtë”, ka thënë Thaçi.

Vetëm dy delegatë kanë qenë kundër këtij profilizimi, të gjithë të tjerët e kanë mbështetur.

Po ashtu, delegatët kanë miratuar edhe ndryshimet tjera në Statutin e PDK’së.

PDK me Asamble të të Urtëve

15:33 Kongresi i Gjashtë i PDK’së, pas një pauze një orëshe, i ka vazhduar punimet.

Gazetarja e ExpressOnline që po e përcjell këtë ngjarje, thotë se aktualisht delegatët po diskutojnë rreth ndryshimeve në Statutin e PDK’së.

Risia e ndryshimeve statutore është formimi i Asamblesë së të Urtëve, organ ky që do të merret me zhvillimet strategjike të partisë dhe ku pretendohet se do të jenë figura emblematike të PDK’së.

718 delegatë votojnë pro Thaçit, 1 kundër

13:07 Në votimin për Kryetar të PDK’së kanë marrë pjesë 719 delegatë, nga ta 718 kanë votuar pro kandidaturës së Hashim Thaçit, derisa vetëm 1 delegat ka votuar kundër.

Në fjalën e tij para delegatëve, Thaçi i ka falënderuar për besimin e dhënë.

“Ju falënderoj për besimin që ma keni dhënë”, ka thënë ai.

“Në këto 13 vite PDK ka kaluar neper sfida dhe ka qenë përballë vendimeve të rënda, por bashkërisht i kemi tejkaluar këto situata. Kjo është vlerë e PDK’së”, ka pohuar Kryetari i PDK’së.

Më pas, ai i ka siguruar ata se partia, nën udhëheqjen e tij, do t’i fitojë zgjedhjet.

“Të nderuar delegatë, ju siguroj se si Kryetar i PDK’së do t’i fitojmë zgjedhjen lokale dhe nacionale”.

Një fjalë të shkurtër ka mbajtur edhe zëvendësi i deritashëm i Thaçit, Hajredin Kuçi.

“Jemi me fat që kemi një Lider që reflekton unitetin e partisë”, tha ai.

Tani delegatët kanë dalë në pauzë, për t’u kthyer më pas për procesin e zgjedhjes së Këshillit Drejtues të PDK’së.

Hashim Thaçi zgjidhet Kryetar i PDK’së

12:49 Hashim Thaçi është rikonfirmuar në krye të PDK’së, përmes votimit të hapur.

Ai u propozua kandidat për Kryetar nga Bajram Rexhepi.

Por, para se të votohej, Thaçi ka kërkuar nga delegatët që votimi për Kryetar të bëhet me votë të fshehtë, e jo me aklamacion. Ky propozim është hedhur në votim, dhe përveç Thaçit, të gjithë delegatët kanë votuar që votimi të jetë i hapur.

Dhe kështu ka ndodhur.

Vetëm një delegat ka votuar kundër Thaçit, të gjithë kanë votuar pro kandidatrës së tij.

Aktualisht, Kryetari i sapozgjedhur i partisë më të madhe në vend po mban një fjalim para të pranishmëve.

12:42 Hashim Thaçi është zgjedhur Kryetar i PDK’së, unanimisht, me aklamacion.

Nis Kongresi i PDK’së, zgjidhet Kryesia e Punës

12:14 Kryesia e Punës ka hapur diskutimin për delegatët e PDK’së.

Aktualisht po flet Arsim Bajrami, derisa më herët të pranishmve iu ka drejtuar Rexhep Hoti.

Ai ka thënë se Jakup Krasniqi duhet të jetë i pranishëm në strukturat udhëheqëse të partisë, pavarësisht se refuzoi të jetë pjesë e Kongresit Zgjedhor.

“Nëse nuk përfshihen gjithë figurat kyçe të PDK’së, nuk kemi bërë asgjë”, tha Hoti, i cili në mandatin e kaluar ishte deputet i PDK’së për një kohë të shkurtër.

11:40 Para pak çastesh ka nisur punimet Kongresi i Gjashtë Zgjedhor i Partisë Demokratike të Kosovës.

Hapjen e punimeve e ka bërë Basri Musmurati, i cili ka prezantuar Raportin e Punës së Këshillit dhe Kryesisë së PDK’së.

Më pas është zgjedhur Kryesia e Punës.

Për këtë detyrë janë zgjedhur Enver Hoxhaj, Hajredin Kuçi, Flora Brovina, Vlora Çitaku, Xhavit Haliti, Ganimete Musliu, Arsim Bajrami, Drita Kadriu dhe Ramë Buja.

Në agjendën e Kongresin tash janë miratimi i ndryshimeve statutare, derisa në mesditë pritet të zgjidhet Kryetari i partisë dhe më pas do të votohet për Këshillin Drejtues.

Deri më tash Hashim Thaçi është kandidati i vetëm për postin e të parit të PDK’së.

Data: 27 Janar 2013 11:40
Autori: GazetaExpress

Të tjera