Kthehu lart

NVM-të gjenerator kryesor i zhvillimit ekonomik në Kosovë

NVM-të gjenerator kryesor i zhvillimit ekonomik në Kosovë
GazetaExpress E premte, 16 Nentor 2012 16:18

Gjendja aktuale dhe sfidat kryesore në fushën e industrisë dhe ndërmarrjet e vogla dhe të mesme si dhe masat e mundshme për adresimin e tyre e perspektiva e institucioneve qeveritare, ishin temat që u diskutuan nga Aleanca Kosovare e Bizneseve, në kuadër të Task Forcës për Integrime Evropian, Agjencia për Mbështetjen e NVM-ve nga Ministria e Tregtisë dhe Industrisë dhe institucione e organizata të kësaj lëmie.

Kryetari i Aleancës Kosovare të Bizneseve, Agim Shahini thënë se gjendja aktuale e industrisë dhe NVM-ve nuk është në nivelin e duhur dhe duhet të krijohet një klimë sa me e përshtatshme për bërje të biznesit.

Sipas tij janë bërë përpjekje, por akoma ka mjaft sfida.

“Një nga sektorët më të rëndësishëm në vend janë edhe NVM-të, ku tregëtia është në një masë të madhe e zhvilluar. Ka mjaft dëshira , por realizimi i tyre nuk është edhe aq i lehtë”, tha Agim Shahini.

Kryetari i AKB-së shtoi se në Kosovë mungojnë edhe politikat adekuate, strategjitë, por ka përpjekje të mira për të ecur përpara dhe NVM-të do të kenë mundësi të rrisin zhvillimin ekonomik dhe mirëqenien e qytetarëve të vendit.

Ai shtoi se Qeveria e Kosovës, duhet të fokusohet në shumë në mbështetjen e NVM-ve, pa lan anash as ndërmarrjet tjera.

“Ndërmarrjet e Vogla dhe të Mesme, janë gjenerues kryesor i zhvillimit dhe punësimit në vend”, tha Shahini.

Sipas tij taksapaguesi më i madh dhe kryesori i shtetit është konsumatori dhe se shporta dhe fuqia e tyre po varfërohet, derisa do duhej të rritet. Pa rritjen e fuqisë blerëse nuk ka edhe zhvillim të NVM-ve.

Ai përmendi edhe sfidat kryesore të cilat janë rritja ekonomike, zhvillimi i NVM-ve, gjetja e tregjeve nga prodhuesit, përmirësimi i legjislacionit për NVM-të, luftimi informalitetit e korrupsionit, reforma në administratën publike, mbyllja e bizneseve e shumë sfida tjera që po pengojnë zhvillimin e NVM-ve.

Ndërsa, sekretarja e përhershme e Ministrisë së Tregtisë dhe Industrisë, Eliana Naka ka thënë se kjo tryezë funksionon në kuadër të Task Forcës për Integrime Evropiane dhe shërben si mekanizëm konsultativ me gjithëpërfshirje shoqërore.

“Fokus mbetet zhvillimi i konsensusit në mes të anëtarëve për gjendjen aktuale në Kosovë në fushën e industrisë dhe NVM-ve. Synimi është që të identifikohen arritjet dhe sfidat kryesore në kuadër të procesit të integrimit evropian e tjera”, tha Naka.

Sipas saj rezultatet do të reflektohen në Strategjinë Nacionale për Integrim Evropian e cila do të ofroi një formulim preciz të objektivave dhe indikatorëve të suksesit.

Kurse, Xhemajl Syla nga Agjencia për Mbështetjen e NVM-ve në Ministrinë e Tregtisë dhe Industrisë, tha se NVM-të ndikojnë drejtpërdrejt në zhvillimin ekonomik, thithjen e investimeve të huaja, mirëqenien e qytetarëve e shumë gjëra tjera. Ai në mënyrë statistikore, tregoi se derisa në vitin 2000 ishin regjistruar si biznese të përkohshme tridhjetë mijë biznese, tash më 2012 si biznese të përhershme janë të regjistruara 119 biznese. Pronësia më e madhe këtyre bizneseve janë në pronësi individuale apo rreth 88.82 për qind apo rreth 105 mijë ndërmarrje.

“NVM-të janë katalizatori i punësimit në Kosovë, ku në NVM janë të punësuar mbi 232 mijë veta apo 81 për qind. Me numrin më të madhe të bizneseve prinë Prishtina dhe Gjilani, ndërsa me numrin më të vogël të tyre është regjioni i Mitrovicës”, tha Xhemajl Syla.

Ai shtoi se NVM-të përbëjnë shtyllën kurrizore të ekonomisë së Kosovës dhe punësimit dhe duhet të ketë një mbështetje më të madhe. /Kosovapress/

Data: 16 Nentor 2012 16:18
Autori: GazetaExpress

Të tjera