E konsideruar në mesin e 6 femrave më seksi të Spanjës, ajo po vazhdon të shndrisë në faqet e revistave prestigjioze të botës për modë. Esquire, Vogue janë vetëm disa nga arenat ku ajo është shfaqur, pa përmendur shfaqjet në televizion. Por, nuk ndalet së sfiduari veten. Në një bisedë për Express, Sandra Falga – aktore dhe modele spanjolle, rrëfen për suksesin dhe sfidat e saj.

Express: Si do ta prezantonit veten para lexuesve kosovarë?

Sandra: Modele, reportere, aktore… shpresoj përmes kësaj interviste njerëz të rinj do ta shohin punën time, do ta njohin karrierën time, për të cilën kam punuar që kur isha fëmijë.

Express: Kur keni filluar të merreni me modë?

Sandra: Në moshën nëntëvjeçare u paraqita për herë të parë në një katalog që reklamonte kostumet e banjës. Me këtë përvojë vërtet po kënaqesha.

Express: E keni ditur –ndjerë gjithnjë që do donit një karrierë në modë?

Sandra: Pothuajse gjithmonë e kam pas ndjenjën e të qenit para kamerave dhe aparateve. Kjo është diçka që doja dhe do të dua të vazhdoj ta bëj për aq kohë sa mundem. Më frymëzon përvoja e të kapurit të momenteve të caktuara dhe të krijoj art.

Express:Cila ka qenë pjesa më e këndshme e përvojës suaj si modele?

Sandra: Përvoja më e këndshme e të punuarit si modele ka qenë kur fillova të bashkëpunoja me fotografë me famë dhe fakti që artistë me nam po interesoheshin për mua.

Express: Sipas jush, ku qëndron dallimi mes të punuarit modele dhe reportere apo aktore?

Sandra: Të qenit modele është diçka brenda meje prejse isha fare e vogël. Jam e familjarizuar me këtë dhe punën me fotografë. Në anën tjetër, si reportere është një tjetër aspekt të cilin e kam zbuluar gjatë karrierës, ngase ndoshta po kërkoja një horizont më të gjerë përvojash.

Express: Ku ndjeheni më rehat: modele, prezantuese apo aktore?

Sandra: Tanimë ndihem rehat para çdo kamere. Fotoaparati kap çaste të momentit, kurse prezantimi para kamerës kap një shtrirje në kohë, prandaj të duhet qëndrim i fortë dhe qëndrueshëm. Pra të nevojitet vazhdimësi momentesh.

Express: Cilat duhet të jenë kualitetet për të qenë e suksesshme në modë dhe televizion?

Sandra: Besoj që më e rëndësishmja është të kesh besim në vete dhe të dish saktësisht se çka do të bësh në jetë në mënyrë që të arrish njëfarë suksesi. Beso në vete dhe çmoje çdo gjë, ngase çdo gjë ka vlerën e vet pavarësisht sa e vogël duket. Unë i shtroj vetës sfida të cilat nuk janë të lehta të arrihen. Prandaj vështirësitë më bëjnë më të guximshme, guxim që më nevojitet për të vazhduar tutje.

Express: Keni ndonjë formulë për sukses?

Sandra: Të jesh vetja. Mos e lejo askënd të ndryshojë atë çka je.

Express: Cili është definimi juaj për suksesin?

Sandra: Për mua, suksesi është të jesh e kënaqur më atë çfarë bën dhe atë çka ke.

Express: A mendoni se e bukura, në të vërtetë, do ta shpejtojë botën?

Sandra: Bukuria është diçka që secili e ka brenda, por nuk do të thotë gjithçka kjo. Mendoj që dashuria është ajo për çka njerëzit kanë nevojë. Në këtë kontekst, ajo që rëndom quhet bukuri sublime- kur buzëqeshja vjen nga brenda, mund ta ndryshojë botën.