Megjithëse është shumë e re, ajo tashmë është një emër shumë i njohur në muzikën e lehtë shqiptare. Kjo është këngëtarja e re shkodrane, Elhaida Dani, fituesja e “Top Fest 9”.

Në një intervistë të dhënë për gazetën “Koha Jonë” në suplementin “Summer Time” Elhaida rrëfen si ka nisur rrugën e këngës, kush ka qenë shtysa për të, cilat janë projektet e saj dhe shumë të tjera. Nëse më parë emri i saj njihej vetëm nga një rreth i ngushtë, sot ajo njihet nga shumë shqiptarë, por ajo rrëfen së është me “këmbë në tokë” dhe se fama thjesht i ka shtuar përgjegjësinë për të dhënë më të mirën nga vetja.

Elhaida çfarë kujtoni nga fillimet tuaja të para në rrugën e këngës?

Unë kam studiuar për piano që në moshën 6-vjeçare dhe kam kënduar gjithmonë, por asnjëherë nuk kam marre pjesë nëpër festivale fëmijësh apo aktivitete të tjera. Vetëm gjatë shkollës së mesme jam bërë pjesë e aktiviteteve të ndryshme shkollore si dhe të qytetit. Pastaj siç e dini dhe pjesëmarrja ime ne “Star Academy” ku unë shpalla fituese, me dha një mundësi evidentimi dhe një shtysë shumë të madhe për t’u marre seriozisht me këngën.

Cila ka qenë pjesëmarrja juaj e parë nëpër festivale?

Unë kam dy histori festivalesh: festivale ndërkombëtarë dhe festivalet kombëtare. Pothuajse të dyja kanë zanafillën në vitin 2011. Në korrik të vitit të kaluar, kam qenë pjesëmarrëse dhe fituese e festivalit ndërkombëtar “Suncane Skale”, pas atij, në shtator pjesëmarrëse dhe fituese e festivalit “Zlaten kesten” në Bullgari. Gjithashtu gjatë 2012 kam qenë pjesëmarrëse dhe fituese në disa festivale të tjera në Rumani e Bullgari. Ndërsa me festivalet kombëtare kam filluar me edicionin e kaluar të festivalit të fundvitit dhe ishte një nder i madh për mua të isha pjesëmarrëse në 50-vjetorin e tij. Kënga ime mori dhe çmimin “best melody” pastaj direkt erdhi Top Fest.

E prisnin vendin e parë në Top Fest?

As nuk e kisha imagjinuar …madje e keni parasysh kur hyn në një kompeticion dhe qoftë vetëm një herë, të kalon nëpër mend “ah sikur ta fitoja” …për mua as kjo s’ka qenë, vetëm kam menduar “ah sikur të isha në finale” ! Por ja që realiteti e tejkaloi ëndrrën time, jo vetëm që isha në Finale por isha edhe fituese e festivalit.

Ju jeni ndër ato këngëtare që kanë menaxherë, çfarë humbin ata këngëtarë që nuk kanë?

Ne kemi një vit që punojmë bashkë dhe jam shumë e kënaqur. Unë kam menaxherë, pra një vajzë dhe ajo merret pothuajse me çdo gjë. Përzgjedhjen e intervistave, party-t, koncertet, festivalet. Madje-madje edhe të veshja ime ndërhyn edhe pse e ka luftë të humbur(qesh). Ata që nuk e kanë, humbin kryesoren, qetësinë dhe qartësinë në përzgjedhje.

Çfarë ka ndryshuar te ju, marrja e një çmimi të madh?

Po e filloj mbase që te reagimet e njerëzve, në qoftë se me përpara njihesha vetëm në rrethin e muzikës live dhe klientelës së saj, sot kudo që kaloj ka reagime. Pas kësaj dhe përgjegjësia e daljes në skenë dhe prezantimi për një kënge të re është rritur.

Po këngës “S’je me” keni menduar që t’i bëni një klip?

Qejf kam t’i bëj një klip të thjeshtë, por jam duke menduar mundësitë.

Ju studioni për…?

Kam mbaruar para një viti Liceun artistik “Preng Jakova” për piano në qytetin tim të lindjes, në Shkodër dhe do të konkurroj këtë vit në Akademinë e Arteve për kompozicion, pasi vitin e kaluar vendosa ta bëja pushim që t’i përkushtohesha punës.

A do të hiqnin dorë nga muzika, nëse do t’ua kërkonte njeriu i juaj i zëmrës?

Duke menduar që njeriu i zemrës duhet të të dojë e të të përkrahë për punën tënde, nuk besoj se do jem para një zgjedhjeje të tillë.

Meqenëse po flasim për këtë temë, a ka një njeri special në jetën tuaj?

Mbesa ime që lindi një javë pas fitores në “Top fest” apo nuk quhet ?! Jo, nuk ka një njeri special në jetën time, pasi jam e fokusuar totalisht diku tjetër këto kohët e fundit. (Me shkurtime nga Koha e Jonë)