E lejueshme dhe e natyrshme

Me gjasë, habia dhe skandalizimi - virtyte të qytetërimit - janë kthyer në vese. Është ves të habitesh dhe skandalizohesh me atë që habit dhe skandalizon.

Për politikën e sotme kosovare dhe elektoratin e tyre familjar e jo votues (definimi familjar mund të jetë i pasaktë dhe pretencioz, megjithatë, i qëndroj pas duke pasur parasysh ato statistika që i kemi: nga numri i përgjithshëm i votuesve, këtë të drejtë e ushtrojnë vetëm gati rreth 40 për qind - çka lë të nënkuptohet se shumica janë elektorat familjar dhe ithtarë fanatikë të subjekteve politike ekzistuese, e një pjesë e vogël thjesht përfitues të tyre), gjithçka është e lejueshme dhe e natyrshme.

Mund të përpilojmë këtu e tash një regjistër të disa ndodhive të fundit dhe të shohim si ka qenë reagimi i vetë subjekteve politike ndaj tyre.

Së pari, dua të them se, nisur nga ato gjëra që do t’i shqyrtojmë, do të dalë se nuk gjen një personalitet politik të vetëm të jetë i habitur dhe të reagojë i habitur dhe i skandalizuar nga ato që ndodhin.

Me këtë dua të them se kemi arritur në atë gjendje ku s’ka asgjë për t’u habitur as për t’u skandalizuar. E nëse nuk ka asgjë për t’u habitur e skandalizuar, atëherë gjithçka është e lejueshme dhe e natyrshme.

Është e lejueshme dhe e natyrshme që kryetarë komunash, si ata të PDK-së në Ferizaj dhe Kaçanik, në veçanti ky i fundit, të përfundojnë në burg për aktivitet kriminal e subjekti politik të cilit i përkisnin të mos e bëjë as dënimin dhe distancimin më të vogël moral. Përkundrazi, me të shkuar në zgjedhjet e jashtëzakonshme, ai subjekt të fitojë përsëri, më moton që të vazhdohet rruga e politikanit të burgosur.

Është e lejueshme dhe e natyrshme që deputetët të rrihen si gangsterë në Parlament dhe të mos hetohen nga policia për rastin as të mos dënohen të paktën moralisht nga subjekti të cilit i përkasin. Përkundrazi, të arsyetohen dhe inkurajohen.

Është e lejueshme dhe natyrshme që zëvendëskryeministri Bukoshi (i akuzuar për shpërdorim detyre sa ushtronte detyrën e Ministrit të Shëndetësisë) e zëvendësministri i Financave si Haraqia (i akuzuar për shpërdorim detyre sa ishte Ministër i Kulturës) nga tash Lista Rugova, dikur nga radhët e LDK-së, të “lirohen nga detyra zyrtare” dhe t’iu ruhet vendi i punës derisa të lirohen. Ngase Qeveria, subjekti përkatës dhe ata vetë janë të sigurt se do të lirohen.

Është e lejueshme dhe e natyrshme të ndërtohen qeveri e koalicione qeveritare me persona të dyshuar për shkelje dhe nën hetime.

Është e lejueshme dhe e natyrshme që ish zëvendëskryeministri dhe Ministri i Drejtësisë, Hajredin Kuçi, të rikthehet me dëshirën e Kryeministrit dhe “me përgjegjësi më të mëdha” në postin nga i cili kishte dhënë dorëheqje. Nga dorëheqja “morale” në krim moral.

Është e lejueshme dhe e arsyeshme që Universiteti i Prishtinës të politizohet aq sa të zgjidhen dekanë edhe ish politikanë e ministra të AAK-së të dyshuar dhe të hetuar për korrupsion si Bujar Dugolli.

Është e lejueshme dhe e natyrshme që në vend të një ministrie, AKR-së t’i jepet posti i Rektoratit të Universitetit të Prishtinës (supozim).

Është e lejueshme dhe e natyrshme që profesorë universiteti të jenë agjentët e shërbimeve sekrete.

Nuk habitemi as nuk skandalizohemi kur ndodhin këto. Nuk habitemi as nuk skandalizohemi kur përsëriten. Nuk habiten as nuk skandalizohen ata që i zgjedhin, nuk habiten as nuk skandalizohen ata që bashkëpunojnë me ta, as ata që e kanë për detyrë t’i parandalojnë dhe ndëshkojnë gjërat e tilla.

E gjitha është normale. Sa më shumë që kalojnë vitet, aq më normale bëhet. Do të thotë, e lejueshme dhe e natyrshme.

E lejueshme dhe e natyrshme për ata që i bëjnë dhe për ne që i zgjedhim t’i bëjnë.

Me gjasë, habia dhe skandalizimi – virtyte të qytetërimit, edukimit dhe kulturës – janë kthyer në vese. Është ves të habitesh dhe skandalizohesh me atë që habit dhe skandalizon.

Jo pse shtiremi se gjithçka është në rregull, por ngase e pranojmë për të lejueshme dhe natyrshme gjithçka, edhe tërë atë të keqe e cila do të duhej të na habiste dhe skandalizonte.

Kur e nëse gjërat janë kështu, kur gjithçka është e lejueshme dhe e natyrshme, atëherë cili është definimi që kemi për veten?