Aventurat e Vetëvendosjes

Për aksionet e tyre politike, Vetëvendosje, ka huazuar recetat e Zvonko Veselinoviqit.

Vetëvendosje, si parti që nuk ofron shpresë për këtë vend, por servon të kaluarën, ndodhet në vlugun e punëve për të mashtruar sa më shumë qytetarë që më 14 janar të jenë në Merdare.

Mendoj se shamata e partizanëve të Vetëvendosjes për bllokimin e kufijve të Kosovës me Serbinë duhet vlerësuar në tri rrafshe: së pari sa i panevojshëm është ky aksion, së dyti sa i dëmshëm është për imazhin e vendit, dhe në fund, sa i rrezikshëm mund të jetë për stabilitetin e brendshëm të vendit.

S’do shumë mend, e as shumë mund për t’u sqaruar se sa i panevojshëm është i gjithë ky aksion. I panevojshëm, ngase masat e reciprocitetit me Serbinë janë duke u zbatuar në tërësi, sipas asaj që është arritur në negociatat në Bruksel. Në të dy anët e vendit mallrat dhe njerëzit janë duke qarkulluar pa probleme të mëdha dhe lirshëm. Benifitet nga hapja e këtyre kufijve janë të mëdha, si për prodhuesit ashtu edhe qytetarët tanë. Se sa është i nevojshëm qarkullimi në këto pika kufitare e kemi parë këto ditë. Bllokada njëditore krijoi kolonat e kosovarëve disa kilometra të gjata dhe deri 20 orë pritjeje. Ato kolona të veturave janë mesazh për të gjithë ithtarët e modelit koreano-verior të izolimit të vendit, dhe barometër i qartë se sa përkrahen tek qytetarët jakobinët e Vetëvendosjes.

Fanatikët e VV’së, si gardianë të zgjidhjeve ekstreme, si për asgjë tjetër, nuk kanë asnjë alternativë t’u ofrojnë qytetarëve që nevojat dhe hallet i shtynë të përdorin territorin e Serbisë.

Prandaj, ky aksion është plotësisht i panevojshëm, por me zarar të madh për imazhin e vendit.

Me barrikadat në kufi, një parti politike po kopjon tërësisht mënyrat e presionit politik të cilat i përdorën për disa muaj rresht bandat e kriminelëve serbë të veriut për të luftuar kundër një parimi fundamental human siç është lëvizja e lirë. Të dehur nga lakmia për pushtet, besoj pa vetëdije, liderët e VV’së kanë vendosur që për veprimet e tyre politike të huazojnë mënyrat e shantazhit sipas recetave të kriminelit Zvonko Veselinoviq. Edhe ikonografia që do t’u përcillet mediave të vendit dhe të huaja është pak a shumë e njëjtë. Mbi të gjitha e shëmtuar.

Do të shohim trushpërlarë në përpjekje për të mbyllur kufirin, njëkohësisht duke u ankuar se jemi vendi i fundit në Ballkan që nuk mund të lëvizim pa viza. Entuziastë të vonuar të revolucionit kombëtar, të grumbulluar rreth zjarreve do të lëshojnë hijet e një kohe të cilën besuam se për të fundit herë e pamë duke dhënë shpirt në pjesën veriore të Mitrovicës.

Veprimet e tilla të papërgjegjshme të një partie politike, fatkeqësisht me sjellje fashiste, ndodhin bash në kohën kur Kosova pritet të nisë dialogun për heqjen e vizave me BE’në. Dalldia për pushtet e drejtuesve të Vetëvendosjes i vë pikëpyetje aspiratës së gjithë qytetarëve tanë të cilët duan të dalin e të kthehen në këtë vend pa ndjenjën përulëse që të krijon procesi i marrjes së një vize. Uzurpatorët e një patriotizmi primitiv, duke u tallur me ne, kanë vendosur t’u vënë flakën ëndrrave tona - që kurrë nuk i kemi pasur aq afër sa tani.

Në kohën kur kufijtë në veri të vendit na i ruajnë ushtarët e KFOR’it, në kohën kur dridhemi nga frika se mos rastësisht ushtarët amerikanë largohen nga vendi, qytetarëve të vendit tonë, fqinjëve, Europës, SHBA’së dhe gjithë atyre që na janë gjendur në ditët më të rënda, nga kazani i politikës së Vetëvendosjes u ofrohet fyerje, izolim, ksenofobi, urrejtje, injorancë, dhunë dhe retorikë e neveritshme populiste - material ky që dikur në rajonin tonë ndizte luftëra.

Ky do të jetë mesazhi i gatuar prej Vetëvendosjes të cilin do t’ia ofrojmë Europës. Dhe nga kush? Nga ne, deri dje të poshtëruar e të robëruar. Nuk di të gjej ilustrim tjetër.

Nëse skenarët e VV’së realizohen, çka dyshoj shumë, aksioni i bllokimit të kufijve mund të jetë edhe i rrezikshëm për stabilitetin e vendit.

Vetëvendosja në qershor të vitit që e lamë, pati provuar të organizojë një protestë. Ishte një dështim spektakular që shpërfaqi groteskën e një partie liliputiane me ambicie gulivereske. Të kujdesshëm që sërish të mos bëhen horë, e duke e ditur se pak qytetarët nga Kosova do të sakrifikojnë fundjavën për teket e drejtuesve të VV’së, këtë herë janë në përpjekje që bllokadës t’i japin një karakter gjithëkombëtar. Ata kanë paralajmëruar dhe propaganduar përforcime me shqiptarë nga Maqedonia, dhe sidomos nga Shqipëria.

Nuk e di a është koincidencë, por protesta e VV’së mbahet bash në përvjetorin e protestës së janarit të vitit të kaluar të socialistëve në Tiranë. Ajo protestë e përgjakshme kishte dëmtuar rëndë imazhin dhe të ardhmen europiane të Shqipërisë. Pasoja e parë: Shqipëria mbeti pas statusin e kandidatit për anëtarësim në BE, njësojë siç mbeti Serbia pa kandidaturë shkaku i barrikadave të Zvonkos në veri të Kosovës.

Me ftesën dhe organizimin e udhëtimit që ka bërë VV për shqiptarët jashtë Kosovës, do të provohet të futen edhe cuba dhe aventurierë të cilët i patën vënë flakën Shqipërisë më 1997, dhe që tentuan edhe në janarin e vitit të kaluar. Kosova, nuk ka nevojë të importojë piroman politikë të 97’ës, kur kemi mjaft të tillë.

Sidoqoftë, diçka të cilën kurrë nuk kam arritur ta kuptoj se si funksionon, por i kam besuar, është ai sensi i arsyes së qytetarëve të këtij vendi, që fatmirësisht gjithmonë kanë ditur t’i ngrenë diga yryshit të aventurierëve politikë. Përmes këtij distancimi, qytetarët periodikisht secilës partie politike ia tregojnë vendin në skenën politike.

Edhe VV’së ia kanë treguar, dhe do t’ia tregojnë vendin.

Thjesht, sepse nuk është mënyra e vetme se si duhet vendi, ajo që na ofron Vetëvendosje. A nuk e ka dashur vendin e vet edhe diaboliku Adolf Hitler? Një dashuri mbi miliona kufoma, që u vranë vetëm se nuk menduan dhe nuk ishin si ai.

Autori është:

Zëvendësministër i Mjedisit dhe Planifikimit Hapësinor. Kjo kolumne është shkruar enkas për Gazetën Express.