Familja kanadeze Oldershaw mund të konsiderohet lirisht si familje olimpike. Pesë anëtarë të saj kanë marrë pjesë në olimpiada të ndryshme, derisa së fundmi një gjë të tillë e bëri edhe Mark Oldershaw. Për dallim nga gjyshi, babai dhe dy xhaxhallarët, 29-vjeçari i gjeneratës së tretë të kësaj familjeje sportistësh, është i pari që arriti të fitojë medalje. Ai u shpërblye me të bronztën, në garën e lundrimit, një fakt ky që e bën atë njeriun më të lumtur në botë.

Kanadezi Mark Oldershaw e fitoi medaljen e bronztë olimpike në lundrim (Canoe) në ditën e 12-të të Olimpiadës, duke e vazhduar kështu dinastinë e familjes Oldershaw në këtë eveniment. Gjyshi i tij, Bert Oldershaw, e nisi traditën pikërisht në Londër, në Olimpiadën e vitit 1948. Babai i Markut dhe dy xhaxhallarët, po ashtu kanë marrë pjesë në olimpiadat e kaluara.

29-vjeçari nga Burlingtoni, Ontario, e shkroi emrin e tij në histori, duke e rrëmbyer një medalje. Olimpisti i gjeneratës së tretë, Mark, është personi i pestë nga familja Oldershaw që merr pjesë në Olimpiadë. Asnjëri nga ta, deri tash nuk kishte arritur ta shijonte ndonjë medalje.

E bronzta e tij arriti vetëm disa minuta pasi miku dhe partneri i ushtrimeve i Oldershawit, Adam van Koeverden, e fitoi të argjendtën në garën K-1 1000 metra, po ashtu në lundrim. “Jam shumë i lumtur, nuk di se çfarë të them”, ka thënë Oldershaw pas garës.

Oldershaw bëri një garë të fortë, duke qëndruar përkrah liderëve, për ta siguruar medaljen e parë të marrë ndonjëherë nga familja Oldershaw, respektivisht medaljen e 13-të për Kanadanë në këtë olimpiadë.

“Nuk e prisja këtë sukses. Kjo javë e tërë ishte java më e mirë e jetës sime dhe ta kap një medalje të bronztë është diçka e jashtëzakonshme”, ka shtuar Mark.

Para ‘Londra 2012’, Oldershaw nuk kishte fituar kurrë medalje në kampionate botërore. Kjo ishte hera e dytë që ai merr pjesë në olimpiadë, pasi kishte marrë pjesë edhe në ‘Pekini 2008’, por që kishte dështuar të avanconte në gjysmëfinale.

Duke e përdorur këtë si motivim, Oldershaw kishte një nismë të fuqishme në ‘Londra 2012’. Ai përfundoi i dyti në kualifikimet e ditës së dhjetë, duke ia bashkuar kësaj edhe një pozitë të dytë në gjysmëfinale, prapa francezit Mathieu Goubel.

Detyra e ardhshme olimpike e Oldershawt është që të brohorasë për shokët e tij, që do të marrin pjesën ë garën 200 metra, në ditën e 14-të të Olimpiadës. “Unë nuk mendoj se jam Marku më i shpejt i ekipit. Mark de Jonge në K-1 (200m) dhe dy djelmosha nga K-2 (200m) dhe Jason Mc Coombs në C1 (200m) janë të tmerrshëm”, përfundoi Oldershaw.