Sikurse vitin e kaluar, edhe këtë vit, nga data 6 deri 10 qershor 2012, Federata Sportive e Punëtorëve të Kosovës (FSPK) ka marrë pjesë në garat ndërkombëtare VARNA 2012.

Në këtë manifestim sportiv – miniolipiadë e sportistëve punëtorë, ku kanë marrë pjesë sportistë nga 4 kontinente të botës, me mbi 2000 garues, FSPK është prezantuar me dy përfaqësueset e veta, në disiplinën e futbollit të vogël dhe basketbollit përkatësisht “streetball”.

Në futboll të vogël, ku kanë garuar gjithsej 72 ekipe, përfaqësuesja kosovare është radhitur e gjashta. Në “streetball”, ku kanë garuar 22 ekipe, përfaqësuesja e Kosovës është radhitur e treta, me numër të barabartë të pikëve me fituesin e vendit të parë dhe të dytë.

Meqenëse rregullat e këtij evenimenti sportiv kanë përcaktuar që 6 vendet e para të shpërblehen me kupa, rrjedhimisht të dy përfaqësueset tona janë kthyer në vend me kupa të fituara.

“Gjatë muajit Janar’12, jemi përpjekur të vejmë kontakt me Harald Bauer, kryetar i CSIT (International Workers & Amateurs in Sports Confederation - Konfederatë Ndërkombëtare e Punëtorëve për Sportistët Amatorë), me qëllim të shqyrtimit të mundësive për pranim të FSPK në CSIT. Meqenëse ky festival sportiv ishte jubilar, i dhjeti me radhë, dhe se në zhvillimet e tij është paraparë të merrë pjesë edhe kryetari i CSIT, z.Harald Bauer, u patëm pajtuar që aty të takohemi dhe të shqyrtimit të mundësive për pranim të FSPK në CSIT”, thuhet në njoftimin e lëshuar nga kreu i FSPK’së Ismail Sadiku.

“Konsiderojmë se takimi ishte i frytshëm. Na është thënë se një anëtarë i Komitetit Ekzekutiv të CSIT do të përcjell aktivitetet tona, dhe në një moment të caktuar do të shqyrtohet kërkesa jonë për pranim, qoftë si anëtarë i rregullt apo në fazën fillestare edhe si anëtarë kandidat”, thuhet ndër të tjera në njoftim.

Federata Sportive e Punëtorëve të Kosovës (FSPK), e themeluar në Shtator të vitit 2009, me qëllim të grumbullimit dhe aktivizimit në gara të kapaciteteve garuese të institucioneve dhe kompanive të vendit, po vazhdon të zhvilloj aktivitetin e saj në forma të ndryshme.

Kështu, në formë të Ligës, ka organizuar dhe po zhvillon gara në disiplinën e futbollit të vogël dhe të basketbollit, kurse në momente të caktuara, po organizon turnire edhe në disiplinat tjera sportive, si në SHAH dhe PING-PONG. Federata synon që në të ardhmen të organizon gara në formë të Ligës edhe në disiplina tjera sportive.