Sigal Prishtina nga sezoni i ardhshëm do t’i ketë model klubet evropiane të basketbollit. Kryetari Blerand Stavileci tregon se, krahas trofeve që janë objektiv jetësor i bardhekaltërve, klubi kryeqytetas do të punojë më shumë dhe do të ndajë buxhet të veçantë për akademinë e vet. Gjithashtu ndeshjet miqësore ndërkombëtare do të jenë ndër prioritetet e klubit më të trofeshëm në basketbollin e pasluftës.

Nga ky sezon, Sigal Prishtina do ta ndërrojë qasjen. Tash e tutje, prioritet i bardhekaltërve nuk do të jenë vetëm trofetë. Në fakt, klubi më i trofeshëm kosovar i basketbollit në vend nga ky moment do të mundohet të punojë sipas modelit të klubeve evropiane, në mënyrë që të jetë sa më i përgatitur kur basketbolli kosovar të ndërkombëtarizohet.

Kryetari i klubit nga kryeqyteti, Blerand Stavileci, e ka shpalosur idenë e re të funksionimit të këtij ekipi, duke treguar se do të ketë ndryshime në të gjitha aspektet. “Do ta nisim një sezon me fizionomi të re. Do ta bëjmë një organizim model, do të punojmë në strukturën e klubit, duke e përfshirë këtu aspektin sportiv dhe atë ekonomik. Do të mundohemi të gjejmë sponsorë, që janë të gatshëm të bashkëpunojnë me ne”, theksoi fillimisht ai në konferencë për shtyp.

“Do të krijojmë kuadro profesionale. Pikë referimi dhe model i kemi klubet evropiane. Për herë të parë do ta ndajmë një pjesë të buxhetit për akademinë e klubit, respektivisht për U-16 e U-18. Po ashtu do të bashkëpunojmë me klubet tjera dhe do të mundohemi të organizojmë ndeshje ndërkombëtare”, shtoi Stavileci i cili njëherësh është edhe ministër i Bujqësisë.

Natyrisht, ai nuk i harroi edhe objektivat sportive, ku ceku se Prishtina si gjithmonë e synon kulmoren, pra të stoliset me titull të kampionit dhe ta fitojë Kupën e Kosovës. Ndërkohë, i pranishëm në konferencë ishte edhe drejtori i kompanisë së sigurimeve Sigal, Avni Ponari. Ai premtoi se bashkëpunimi prej 9 vjetësh me prishtinasit do të vazhdojë edhe në të ardhmen.

Ponari tregoi se deri tash kompania që ai e drejton ka shpenzuar 900 mijë euro, ndërsa në 10 vjetorin e bashkëpunimit me Prishtinën do të arrijë shifra e 1 milion eurove të dhëna për nënkampionin e Kosovës. Kurse, drejtori i Sigal Prishtinës, Artan Rugova, u shpreh se Prishtina përpos që synon ta fitojë titullin në Kosovë, objektiv i saj është të shpallet edhe kampion mbarëkombëtar.

Krasniqi: Sezoni i ri, me freskime në ekip

Shefi i shtabit teknik të Sigal Prishtinës, Arben Krasniqi, ka folur për risitë në ekipin e tij dhe për përgatitjet që do t’i zhvillojë për sezonin e ri 2012/13. Sipas tij, prishtinasit do t’i nisin përgatitjet të hënën që vjen, më 6 gusht, ndërsa këtë javë basketbollistët do t’u nënshtrohen testeve mjekësore.

“Kemi bërë ndryshime në ekip, ku kanë ardhur disa lojtarë të rinj. Do t’i kemi 6-7 javë stërvitje, ku ndërkohë do t’i zhvillojmë edhe 9-11 ndeshje miqësore. Më pas do ta shohim se cilët prej lojtarëve e meritojnë ta veshin fanellën e ekipit tonë e cilët jo. Pres angazhim, disiplinë, punë dhe sakrificë. Nëse këto nuk mungojnë, jam i bindur se nuk do të mungojnë as sukseset”, theksoi trajneri që ka fituar më së shumti trofe në basketbollin e pasluftës.

Kuraja: Maksimumin për Prishtinën

Sigal Prishtina i ka prezantuar zyrtarisht të enjten katër përforcimet për sezonin e ri, përfshirë këtu Edis Kurajën, Hekuran Binxhinë, Gazmend Sinanin dhe Mustafë Merovcin. Ndërkohë, nga ekipi janë larguar Alban Veseli dhe Muhamet Hasani. Krah-qendra Kuraja, i cili rikthehet në ekipin kryeqytetas pas një periudhe të gjatë, ndihet i lumtur që iu dha mundësia ta veshë sërish fanellën e ekipit ku e kishte nisur karrierën.

“Gjithmonë më ka përcjellë nostalgjia për t’u rikthyer në Prishtinë, ku e kam nisur karrierën. Synoj që këtu ta përfundoj karrierën time. Do ta jap maksimumin për Prishtinën dhe do të jem përkrah klubit në çdo moment, duke i mbrojtur interesat e tij. Kam nënshkruar kontratë njëvjeçare me mundësi vazhdimi për një tjetër. Me kontributin tim besoj se do të arrijmë suksese në sezonet në vazhdim”, deklaroi Kuraja i cili së fundmi ka luajtur në Pejë dhe Kolegjin Universi.