Uniteti në Kryesinë e Sigal Prishtinës vazhdon të mos jetë në shkallën e duhur. Këtë e konfirmon edhe fakti se vetëm gjysma e anëtarëve të udhëheqësisë ishin të pajtimit që Edis Kuraja të kthehet në skuadrën bardhekaltër. Kurse, zyrtarët të tjerë të klubit, duke përfshirë edhe trajnerët, ishin kundër ardhjes së tij, me arsyetimin se Kuraja ishte fajtori kryesor që Sigal Prishtinën e kishte çuar në prag të shuarjes.

Kryesia e Sigal Prishtinës vazhdon të mos jetë unike sa duhet.

E, ky problem ka lëshuar rrënjë që para fillimit të kampionatit të kaluar, kur kryesia e saj ishte e ndarë në dysh, pasi njëra palë, që udhëhiqej nga Artan Rugova, kishin vendosur ta shuante klubin për shkak të borxheve, kurse pala tjetër, që udhëhiqej nga Blerand Stavileci, e kundërshtonte shuarjen e klubit bardhekaltër.

Pas shumë hallakamave, të dyja palët kishin arritur marrëveshje që mos të shuhej klubi, por atë ta menaxhonin bashkërisht. Sipas marrëveshjes, Bordi aktual i Sigal Prishtinës përbëhet prej tetë anëtarëve me të drejt vote – katër nga krahu i Stavilecit, kurse katër të tjerë nga ai i Rugovës.

Gjatë gjithë edicionit të fundit, palët ia kanë dalë ta udhëhiqnin bashkërisht dhe pa zhurmë skuadrën e tyre. Por, qetësia është prishur kohëve të fundit. E shkak i kësaj është bërë basketbollisti Edis Kuraja, i cili pas disa vitesh, para pak ditësh iu rikthye Sigal Prishtinës.

Sipas burimeve të gazetës Express, brenda klubit bardhekaltër, Edis Kuraja është transferuar në Sigal Prishtinë me iniciativën dhe insistimin e ‘krahut të Stavilecit’. Kjo nismë e ‘krahut të Stavilecit’ kishte ngjallur reagim të ashpër të ‘krahut të Rugovës’, që nuk e donte Kurajën në skuadër.

Sipas burimeve, ‘krahu i Rugovës’ nuk e donte Kurajën, me arsyetimin se ai ishte njëri prej arsyeve kryesore që para një viti i kishte shtyrë të vendosnin për ta shuar klubin. “Siç thoshte ‘krahu i Rugovës’, klubi i kishte borxh Edis Kurajës. Kurse, Kuraja ia bllokonte xhirollogaritë klubit dhe ia pamundësonte të funksiononte siç duhet. Kjo e kishte shtyrë Rugovën me shokë që ta shuanin klubin. Prandaj, ‘krahu i Rugovës’ nuk e donte Kurajën”, ka thënë burimi i afërt me zhvillimet.

Madje, sipas këtij burimi, kundër ardhjes së Edis Kurajës ishte edhe vetë trajneri i Sigal Prishtinës, Arben Krasniqi.

“Por, me insistimin e të tjerëve, ‘krahu i Rugovës’ dhe trajneri lëshuan pe dhe pranuan që Edis Kuraja të vijë në skuadër. Këta njerëz lëshuan pe vetëm për hir të asaj që mos të përkeqësohen raportet me zyrtarë të tjerë për hir të klubit”, përfundoi ai.

Express ka provuar të kontaktojë të dielën me Kurajën, por kjo ka qenë e pamundur. Duhet theksuar se, sipas një marrëveshje mes ‘krahut të Rugovës’ dhe ‘krahut të Stavilecit’, të ndërmjetësuar nga Federata e Basketbollit e Kosovës në tetorin e vitit të kaluar, Sigal Prishtina do të udhëhiqet nga kryesia e përkohshme e formuar nga të dy taborët deri në fund të edicionit 2012/2013, kur do të mbahet Kuvendi Zgjedhor.