‘Londra 2012’ rrezikon të jetë Olimpiada e fundit ku Shtetet e Bashkuara të Amerikës do të marrin pjesë me basketbollistë profesionistë nga NBA.

Ky ‘kërcënim’ arrin nga komisari i ligës, David Stern, i cili u doli në krah pronarëve të klubeve, të cilët nuk dëshirojnë t’i rrezikojnë yjet e tyre, të cilët mund të pësojnë lëndime në këtë eveniment.

Por, edhe aspekti financiar e bën të veten, në këto ditë krize.

“I kemi dhënë shumë Olimpiadës, e kemi ndihmuar rritjen e basketbollit në nivelin botëror, por mendoj se tash është momenti ta bëjmë një hap prapa”, ka thënë Stern, i cili ka propozuar që të përdoret stili i futbollit, ku përfaqësueset marrin pjesë me ekipet U-23.

I menjëhershëm ka qenë reagimi i yllit të Los Angeles Lakers, Kobe Bryant, i cili mendon krejt ndryshe. Lojtari amerikan thotë se Olimpiada nuk do të kishte kuptim pa yjet amerikane të basketbollit.

“Olimpiada duhet të vazhdojë kështu. Duhet të jetë një turne ku përballen të gjithë lojtarët më të mirë të botës. Vizioni i Stern është i gabuar. Nëse do të isha pronar i një klubi, do të isha i kënaqur që lojtarët e mi marrin pjesë në Olimpiadë”, tha Kobe.

“Sepse, nëse nuk do ta bënin, do të luanin megjithatë basketboll gjatë verës dhe nuk mund t’i kontrollosh. Ndoshta do të luanin në rrugë dhe rreziqet janë evidente. Kurse, në Olimpiadë mund të ushtrojnë, ka staf kualitativ, ndiqen rregullisht dhe marrin eksperiencë duke luajtur ndaj më të fortëve të botës”, përfundoi Bryant.