Trepça e ka shuar etjen. Pas rrafsh një dekade, ‘Xehetarët’ janë shpallur kampionë të rinj të Kosovës. Këtë sukses mitrovicasit e arritën falë fitores që e shënuan midis kryeqytetit, në ndeshjen e pestë finale përballë Sigal Prishtinës me rezultat 67:79. Kështu, mitrovicasit i dhanë fund dominimit disa vjeçar të ekipit bardh e kaltër, i cili sivjet nuk funksioni si në vitet e kaluara.

Trepça i ka dhënë fund dominimit disa vjeçar të Sigal Prishtinës në basketbollin kosovar. ‘Xehetarët’ të mërkurën mbrëma janë shpallur kampionë të rinj të Kosovës, pas plot dhjetë vitesh pritje.

Në fakt, Sigal Prishtinës nuk i ka mjaftuar përkrahja e zjarrtë e ‘Plisave’, pasi u mposht midis kryeqytetit nga rivali i përbetuar i saj nga Mitrovica në ndeshjen e pestë finale të play-off’it me rezultat 67:79.

Kështu, gjelbërezinjtë u stolisën për herë të tretë në periudhën e pasluftës me titull të kampionit, pasi serinë e ndeshjeve finale e përmbyllën me rezultat të përgjithshëm 3:2 nda Sigal Prishtinës, e cila sivjet ishte shumë më e zbehtë në dallim prej viteve të kaluara.

Mitrovicasit ishin dukshëm më të përqendruar në ndeshjen e pestë finale sesa prishtinasit.

Fillimisht bardhekaltrit e nisën mirë takimin, pasi çerekun e parë e përmbyllën me rezultat 23:17. Mirëpo, mysafirët u këndellën shpejt, pasi periudhën e dytë të lojës e fituan me rezultat 18:22. Hapat më të mëdhenj drejt titullit mitrovicasit i bënë në çerekun e tretë, të cilin e fituan me rezultat 13:20. Ndërsa, triumfi i prishtinasve në çerekun e katërt me rezultat 23:20 nuk u mjaftoi për ta rrëmbyer titullin.

Këtë epitet e fitoi Trepça, e cila u ndihmua më së shumti nga Drilon Hajrizi, i cili i shënoi plot 26 pikë. “Po i shijoj momentet më të mira të karrierës sime. Nuk kam koment. Nuk paska asgjë më mirë sesa të jesh kampion”, tha Hajrizi pas ndeshjes.

Ndërsa, i mërzitur ishte kapiteni i bardhekaltërve, Edmond Azemi, i cili në gjashtë vitet e kaluar e pati quar lartë të njëjtin trofe. “Trepça ishte më e përqendruar. Ne dështuam në çerekun e tretë dhe Trepça e shfrytëzoi këtë, duke fituar me meritë”, tha Azemi, i cili i shënoi 11 pikë, një më pak sesa Gilchrist.

Duhet theksuar se pikërisht Trepça sivjet ia ka dal ta lë ekipin prishtinas duarthatë. Përveç që e mposhti në finale për titull, mitrovicasit e kishin eliminuar Sigal Prishtinën edhe në gjysmëfinale të Kupës, të cilin trofe më pas vetë fituar falë fitores në finale ndaj Bashkimit. Trepça në pjesën më të madhe të garave të rregullta kampionale printe në tabelën e klasifikimit, por kah fundi primatin ia pati marr rivali i saj, Sigal Prishtina.

Kjo skuadër sivjet nuk ka funksionuar sikurse viteve të kaluara. Basketbollistët e saj, posaçërisht në play-off, ishin shumë të pasaktë nga gjuajtjet për tri pikë, e madje edhe nga ato të lira, por fort të sigurt nuk ishin as në ato për dy pikë. Thjeshtë nuk kishte siguri në lojën e saj siç kishte viteve të kaluara. Bankina e lojtarëve të saj dukej më e varfër, derisa një pjesë e fajit u takon edhe dy përforcimeve të saj, Gerard Inman e John Gilchrist, të cilët nuk e dhanë atë që priste trajneri Arben Krasniqi dhe tifozët e tyre, ‘Plisat’.