Zjarri i përhapur në bjeshkët e Deçanit, përkatësisht në vendin e quajtur Jedovë, në pjesën e regjionit të Vokshit tash e pesë ditë më radhë ende nuk është lokalizuar në tërësi.

Kjo me vetë faktin se bjeshkët janë aq të larta dhe të thepisura saqë e pamundëson mbërritjen deri në afërsi njëkohësisht një pjesë e këtyre bjeshkëve ende janë të minuarat që nga përfundimi i luftës së fundit.

Zjarri në këto anë ka përfshirë një sipërfaqe prej 100 hektarë pyje dhe perimetri i vijës së zjarrit është rreth 15 km.

Përveç dëmeve të shkaktuara nga ky zjarr që nuk po arrin të lokalizohet në tërësi janë rrezikuar edhe banorët të cilët kanë dalë për verime në këto bjeshkë, me ç’rast ekipi i zjarrfikësve janë evakuuar edhe disa banorë, ndër ta edhe disa fëmijë më aftësi të kufizuara.

Për të parë për së afërmi gjendjen në bjeshkën e Jedovës, rajonin e ka vizituar edhe kryetari i komunës Rasim Selmanaj, i shoqëruar edhe nga komandanti i stacionit të policisë në Deçan, toger Sejdi Dobraj.

Nga banorët të cilët tashmë ishin evakuuar mësuam se tashmë stanet janë boshatisur nga qytetarët nga frika se mund të pësojnë nga zjarri. Kurse zjarrfikësve të Komunës së Deçanit iu kanë dalë në ndihmë edhe zjarrfikësit e Junikut, të Pejës e të Gjakovës .

Drejtori i Shërbimeve Publike dhe Emergjencave, Admir Hasanaj ka pohuar se tashmë në Judovë është lokalizuar zjarri, mirëpo rreziku për përhapje vazhdon të mbetet, kjo varet edhe nga faktori kohë.

Gjithsesi Hasanaj ka deklaruar se sot gjendja është më e qetë dhe dy ekipe të zjarrfikësve të Deçanit dhe një i Junikut po vazhdojnë të shuajnë zjarret. Sa i përket zjarrit në vendin e quajtur Belle, në afërsi të bjeshkëve të Strellcit, aty është përfshirë një sipërfaqe shkëmbore gjë që ka qenë e pamundur të intervenohet nga zjarrfikësit.

Hasanaj bëri të ditur se kanë kërkuar edhe ndihmën e KFOR-it, por deri më tani nuk kanë marrë ndonjë përgjigje nga ana e tyre.