Ambasada Amerikane në Kosovë ka mohuar deklaratat nga Kryeministria dhe Ministria e Administratës Publike (MAP), që ajo të ketë dhënë donacion për projektin E-kabineti dedikuar Qeverisë së Kosovës. Gjithashtu mbetet e paqartë se sa në të vërtetë do të kushtojë E-kabineti. (Fotoja është marrë nga faqja zyrtare e MAP-it)

Më datë 20 maj Kosovapress ka raportuar me një shkrim se ka mjaftuar një kërkesë e drejtorit të Departamentit të E-qeverisjes dhe Proceseve Administrative (DeQPA), z. Driart Elshani dhe brenda jo më shumë se dy javëve sekretari i Ministrisë së Administratës Publike (MAP), Fitim Sadiku, ia ka aprovuar projektin E-kabineti në vlerë prej 330.000 euro, dhe se MAP-i i pat deklaruar Kosovapress-it se kjo shumë është dhënë duke e marrë parasysh një donacion të dhënë nga ICITAP për E-kabinet.

Në përgjigjen dërguar Kosovapress-it, Ambasada Amerikane në Kosovë mohon të ketë dhënë donacion të tillë, por cekë se qysh në shtator të vitit të kaluar ka përfunduar një projekt tjetër për Zyrën e Kryeministrit në vlerë prej 250 mijë dollarësh.

“As ambasada e SHBA-ve dhe as ICITAP-i (Programi Ndërkombëtar i Asistencës Trajnuese për Hetime të Krimit i Departamentit të Drejtësisë të SHBA-ve) nuk kanë siguruar financim apo asistencë tjetër për projektin e “e-Kabinetit” të Qeverisë së Kosovës. Por, në shtator të vitit 2011, Ambasada (përmes ICITAP-it) ka përfunduar një projekt tjetër në vlerë prej 250,000 dollarëve të SHBA-ve për trajnim dhe instalim të harduerit të teknologjisë informative për Zyrën e Kryeministrit. ICITAP nuk është përgjegjës për planifikimin, financimin, apo zbatimin e projektit të E-kabinet-it”, thuhet në përgjigjen elektronike të Ambasadës Amerikane në Kosovë.

Kurse në përgjigjen e MAP-it dhënë Kosovapress-it thuhet se është pranuar një donacion për E-kabinet nga Ambasada Amerikane.

“Pas kontaktimit me zyrtarë të ZKM-së konfirmohet se është pranuar një donacion nga ICITAP-i në vlerë prej 250 mijë dollarësh për trajnim dhe furnizim me pajisje harduerike për këtë projekt. Ndërsa, MAP-i ka qenë përgjegjës për zbatimin e projektit të softuerit për projektin E-kabineti”, thuhet në përgjigjen e MAP-it.

Jo vetëm MAP-i, por edhe Zyra e Kryeministrit e pohon se SHBA-ja përmes institucioneve të saj në Kosovë ka dhënë donacion për E-kabinetin, duke rënë kështu në kundërshtim me përgjigjen e Ambasadës Amerikane dhënë më lartë.

“Meqenëse projekti përfshinë pjesën harduerike dhe softuerike të këtij sistemi, Zyra e Kryeministrit ka pranuar donacion pajisje harduerike (server, voip telefoni) për avancimin e infrastrukturës së IT-së në përgjithësi dhe një pjesë e këtyre pajisjeve janë përdorur për implementimin e projektit të E-kabinetit. Donacioni është dhënë nga Shtetet e Bashkuara të Amerikës përmes institucioneve përkatëse të tyre të vendosura në Kosovë”, thuhet në përgjigjen elektronike të ZKM-së dhënë Kosovapress-it.

Kosovapress i ka kërkuar Zyrës së Kryeministrit edhe kopje të dokumentit për donacionin e dhënë, por nuk na është siguruar asgjë.

Shpërputhje tjetër lidhur me donacionin është edhe deklarata e MAP-i, që thotë se për E-kabinetin është përfshirë Ambasada Amerikane, përmes ICITAP-it.

“Në këtë projekt kanë qenë të përfshirë edhe donatorë tjerë, në këtë rast, Ambasada Amerikane përmes ICITAP”, thuhet në përgjigjen e MAP-it.

Por këtë e mohon Ambasada Amerikane, duke thënë se ICITAP-i nuk është përgjegjës për këtë projekt.

“ICITAP nuk është përgjegjës për planifikimin, financimin, apo zbatimin e projektit të E-kabinetit”, thuhet në përgjigjen elektronike të Ambasadës Amerikane në Kosovë.

Shpërputhje tjetër ndodh edhe sa i përket ndarjes së mjeteve nga MAP-i për implementimin e E-kabinetit, ku në dosjen zyrtare shkruan se kjo ministri ka zotuar 321.146 mijë euro, kurse në kërkesën e saj dërguar Agjencionit të Prokurimit Publik (APP) për miratim të procedurës së nënshkrimit të marrëveshjes për ndarje të mjeteve për E-kabinet figuron shuma 300 mijë euro, ndërsa në përgjigjen elektronike dhënë Kosovapressit, MAP shkruan se “Pjesa që e financon MAP është 320,000 €”. Ndërkohë që MAP-i thotë se një shumë prej 300.000 eurove është siguruar nga donatorët, si Ambasada Amerikane, ku përmendet një shumë prej 250.000 dollarësh që edhe sikur të jetë e dedikuar për E-kabinet nuk e ka vlerën e 300.000 eurove, por sipas kursit ditorë vlera e 250.000 dollarëve sillet rreth 200.000 euro.

Gjithashtu mbetët shumë e paqartë shuma për implementimin e E-kabinetit. Përderisa drejtori i DeQPA-së, Driart Elshani, në letrën e dërguar sekretarit Fitim Sadiku, letër e cila menjëherë miratohet nga sekretari, shkruan se ”Sipas analizave të bëra dhe planit të detaizuar për implementimin e projektit nevojitet një kosto për rreth 300.000 euro”, tani na del se shuma për implementimin e E-kabinetit është shumë më e madhe se “rreth 300.000 eurot” e kërkuara. Shuma e përgjithshme sipas MAP-it na del rreth 620.000 euro.

Në përgjigjen e mëhershme të MAP-it lidhur me mjetet që janë dedikuar për këtë projekt, përmenden donatorë, por nuk specifikohet donacioni prej 50 mijë dollarëve, i cili sipas asaj që ka thënë Driart Elshani në kërkesë është pranuar fillimisht nga Microsoft. Në përgjigjen përmes postës elektronike të MAP-it thuhet se “Pjesa që e financon MAP është 320,000 €, ndërsa pjesën tjetër prej 300,000 € e kane siguruar donatoret”, thuhet në përgjigjen e MAP-it.

Tani mund të bëhet një pyetje e thjeshtë: Sa ne të vërtetë do të kushtojë E-kabineti dhe a është e përfshirë në ketë shumë e gjitha vlera e projektit. Kjo behët edhe për një arsye, se sipas disa burimeve tani po kërkohet nga MAP-i, edhe ndarje e një shume shtesë për implementimin projektit, e konkretisht për blerjen e kompjuterëve laptop dhe “pajisje” shtesë për E-kabinet.

Gjithashtu ne kemi raportuar në shkrimin e kaluar se për këtë projekt nuk ka pasur fare tender publik, e që bien në kundërshtim me ligjet në fuqi, ku procedurat e prokurimit parashohin që për ndarjen e mjeteve për çfarëdo projekti me vlerë mbi 10 mijë euro, duhet të hapet tender publik.

Njohësit e fushës së IT-së thonë se në rastet e implementimit të projekteve, siç janë ato për E-kabinet, pajisjet si hardueri dhe softueri kushtojnë pothuajse në vlerë të njëjtë.

Profesori i IT-së në universitetin UBT, Petrit Shala, i ka thënë Kosovapress-it përmes telefonit se për implementimin e projekteve për E-kabinet apo E-qeverisje, hardueri dhe softueri kushtojnë 50 me 50.

“Rast konkret për implementimin e projekteve në E-qeverisje lirisht mund ta them se këto shkojnë 50 me 50, sepse ka involvim edhe harduerik dhe softuerik. Pra këto shkojnë paralel, në këtë rast për projekte të tilla, ku bëhet ruajtja e të gjitha të dhënave, ruajtja e tyre. Domethënë, edhe nga ana financiare shkojnë 50 me 50”, ka thënë ai për Kosovapress.

Lidhur me implementimin e projekteve siç është E-kabineti, kompanitë në Kosovë që merren me projekte të IT-ve i kanë thënë Kosovapress-it përmes telefonit në kushte anonimiteti, se projektin siç është E-kabineti do ta implementonin me një kosto shumë më të ulët, duke e quajtur shumën që e ka ndarë MAP-i si të fryrë./Kosovapress/