Lëvizja Vetëvendosje ka reaguar sot ndaj zyrtarëve komunal të Prishtinës të cilët kanë thënë se Vetëvendosje e ka huq adresën e kritikave për mos furnizim të kryeqytetit me ujë.

Sipas Vetëvendosjes, neni 15 i Statutit Komunës së Prishtinës flet qartë për obligimin e Komunës për furnizim të qytetarëve me ujë.

Vetëvendosje përmes një kumtese për media theksoi se komuna e Prishtinës po mundohet t’i ikë përgjegjësisë për dështimin e tyre 13-vjeçar për furnizim me ujë të qytetarëve.

“Pas aksionit tonë simbolik të 15 qershorit, ‘Kryetar na thajte!’, pushteti i Kryetarit të komunës së Prishtinës, Isa Mustafa, reagoi. Na thanë se paskemi gabuar adresën e protestës dhe se kinse pasi e paskemi marrë vesh këtë ‘fakt’, qenkemi larguar nga oborri i komunës. Në të njëjtën kohë u munduan të tregojnë para kamerave se po i njihkan aktet ligjore të Republikës së Kosovës. Thjeshtë ata po mundohen që t’i ikin përgjegjësisë për dështimin e tyre 13-vjeçar për furnizim me ujë të qytetarëve të Prishtinës”, thuhet në kumtesë.

Sipas VV-së, pushtetarët komunalë të LDK-së në Prishtinë duhet të japin llogari për 13 vitet e reduktimeve të ujit, për shkak se neni 15 i Statutit Komunës së Prishtinës si akti më i lartë juridik përcakton qartë kompetencat vetanake të Komunës.

“Pika f) e këtij neni flet decidivisht për obligimin e Komunës për furnizim të qytetarëve me ujë: Ofrimin dhe mirëmbajtjen e shërbimeve publike dhe shërbimeve komunale, duke përfshirë: furnizimin me ujë, kanalizimin dhe drenazhin, trajtimin e ujërave të zeza, menaxhimin e mbeturinave, rrugëve lokale, transportit lokal dhe skemave të nxehjes lokale”, thuhet në kumtesë.

“Statuti e obligon pushtetin komunal që t’ua sigurojë qytetarëve furnizimin me ujë. Isa Mustafa u bë kryetar edhe në sajë të premtimit ‘24 orë ujë’! Ndërsa sot ai nuk po ka kohë as që t’i numërojë premtimet e tij të parealizuara, për shkak se angazhim kryesor të tijin i ka pazaret politike me Hashim Thaçin, e jo hallet e shumta të qytetarëve të Prishtinës. Thaçi e Mustafa nëpërmjet të ashtuquajturës Reformë Zgjedhore, po tentojnë ta fuqizojnë pushtetin e tyre të padrejtë në kurriz të vuajtjeve të qytetarëve”, vlerëson Vetëvendosje.