Rënia e dërgesave të emigrantëve do të ketë pasoja në ekonominë kosovare, thonë ekspertë për çështje ekonomike.

Sipas një raporti të UNDP-së dhe Organizatës Ndërkombëtare për Migrim, thuhet se në tre mujorin e parë të këtij viti, remitencat kanë rënë për 6 milionë euro, ndërsa në vitin 2011 këto dërgesa kanë rënë për 14 për qind krahasuar me vitin 2010.

Lekë Musa, nga Oda Ekonomike Amerikane në Prishtinë, tha se ndër financuesit kryesorë të kësaj ekonomie dhe konsumit vendor janë remitencat nga jashtë.

“Mos harroni se gjatë këtyre viteve, pas luftës, dy burimet kryesore të financimit, kanë qenë remitencat dhe donacionet nga jashtë. Tani meqenëse kemi një tkurrje të donacioneve që kanë ardhur nga jashtë, mirëpo nga ana tjetër një rënie të remitencave, të dy këto shkurtime do të kenë pasojë për ekonominë e Kosovës”, tha Musa.

Megjithatë, varësia nga remitencat mbetet e lartë.

Shumica e emigrantëve që investojnë në Kosovë nuk i kanalizojnë mjetet në aktivitete produktive për gjenerim të të ardhurave, apo punësimit.

Sipas raportit të fundit, rreth 90 për qind e këtyre mjeteve financiare shfrytëzohen për konsum bazik nga pranuesit.

Edhe Lekë Musa, thotë se me rënien e remitencave do të ketë zvogëlim të konsumit.

“Në rast se bie konsumi, sepse këto para, emigrantët kosovarë kanë financuar konsumin në shumë familje, ky zvogëlim i konsumit do të ketë pasoja direkt në uljen e kërkesës brenda në Kosovë. Ulja e kërkesës brenda në Kosovë do të ndihet në mënyrë indirekte edhe te biznesi, pasi do të ketë ulje të kërkesave për mallra dhe shërbime, si nga importi po ashtu edhe prodhimit vendor, e kjo do të reflekton edhe në shkurtimin e vendeve të punës”, theskon Musa.

Edhe eksperti tjetër i ekonomisë, Muhamet Sadiku, konsideron se ulja e dërgesave nga jashtë viteve të kaluara, por edhe gjatë këtij viti duhet të trajtohet si problem, pasi ulja e tyre, lidhet drejtpërdrejt me uljen e konsumit të qytetarëve kosovarë.

Megjithatë, Sadiku konsideron se arsyeja e rënies se remitencave është kriza ekonomike në eurozonë.

“Duhet kuptuar se bota tani, eurozona është duke përjetuar goditje serioze, kriza po merr përmasa serioze dhe të parët që do të goditën në Bashkimin Evropian janë të punësuarit, sepse kompanitë multinacionale, kompanitë tjera vazhdojnë të reduktojnë numrin e të punësuarave dhe kjo do të sjellë probleme edhe te kosovarët të cilët janë duke punuar në perëndim”, shprehet Sadiku.

Dërgesat e mjeteve financiare nga familjarët e tyre që jetojnë në vende të ndryshme të Evropës, në vitin 2011, kanë qenë 379 milion euro, përderisa në vitin 2010 këto dërgesa kanë qenë 442 milionë euro.